– Det er mykje betre å gjera noko, enn ingenting

Kurshaldar Magny Bratsberg losa ungdommane gjennom fleire viktige tema som hjarte- og lungeredning og kva ein skal gjera dersom ein hamnar i ulike situasjonar. Elevane fekk både høyre om teorien samtidig som dei fekk servert nokre praktiske dømer på kor og korleis.

– Kvifor trur de dei anbefaler fem innblåsingar når det gjeld hjartestans hjå barn og ved drukningulukker? Jo, fordi hovudårsaken til hjartestansen i dei tilfella er pusteproblem, informerte Bratsberg elevane.

– Men dei fem innblåsingane gjeld berre fyrste gongen. Heile vegen vidare skal ein fortsetje med 30 kompresjonar og 2 innblåsingar, fortsette ho.

Trygga dei

Bratsberg understreka likevel at hennar viktigaste oppgåve denne dagen, i tillegg til å gje dei enkle tips, hovudsakleg var å trygga dei på at dei ikkje kan gjera noko feil.

– Det er betre å gjera noko som helst enn ingenting i det heile. Tenk på kva det vil seia for dei som overlever og deira familiar at dette gjekk rette vegen på grunn av dykkar handlingar, sa Bratsberg til dei lyttande elevane.

Bratsberg var også svært imponert over ungdommane ho hadde med seg denne dagen.

– Det har vore utruleg bra så langt. Dei er ein kjempegjeng, og dei er heilt med. Dei kjem med både spørsmål og ynskjer gjerne å fortelja om eigne opplevingar. Me får gode tilbakemeldingar kvart år, noko som også er mykje av grunnen til at me gjer dette kvart år, fortel ho.

– Kvifor er slike kurs viktige?

– Det er viktig å veta kva du skal gjera når du er fyrstemann på staden, fastslår Bratsberg.

Også lærarane er glade for at elevane får høve til å ta dette kurset.

– Dette er kjempeviktig. Ein kan aldri læra for mykje om livreddande fyrstehjelp. I tillegg trur eg at dess meir det vert snakka om, dess enklare blir det gjerne å tora og gjera noko dersom dei skulle hamna i ein slik situasjon, sa trinnleiar Randi Steinsletten.

– Magni er også veldig flink. Ho fortel så godt og klarer å formidla ting på ein forståeleg måte for dei. I tillegg klarer ho å trekkja inn situasjonar som kan skje i deira kvardag. Dei fortel i alle sjølv at det er spanande, og mange av dei får seg ei aha-oppleving. Ikkje minst så lærer dei at det ikkje er så farleg å ringa nødnummeret som dei i utgangspunktet trudde, la ho til.

Kunnskapsrike

I siste timen var det klart for at elevane sjølve fekk testa ut dei nye ferdigheitene på ein gjeng hjelpevillige dokker.

– Det er jo ganske bra, og viktig, sjølv om eg visste mykje av dette frå før, fortalde ein av 10.-klassingane Malin K. A. Stølsvik.

Medelev Nelly Borgen Hermannsen sa seg einig.

– Det er eit greit opplegg, nødvendig. Eg har jo sjølvsagt lært noko nytt, men eg og kunne ein del frå før etter å ha gått i speidaren, sa ho.