– Det er jo litt spesielt

Måndag kveld og tysdag morgon stilte me alle kandidatane fylgjande spørsmål:

1.Kva tankar sit du att med etter valkvelden?

2.Kva er planane i forhandlingane?

AP med Thea Vaage:

1. – Me er jo litt skuffa, me hadde heilt klart håpa på sju mandat, så det er jo litt keisamt. Det har også vore ein del misnøye med regjeringa, og eg trur at det er noko lokallaga også får svi litt for sjølv om er har inntrykk av at mange er ganske nøgde med oss her i kommunen, sa Vaage måndag kveld.

2. – Eg snakkar med dei fleste. Me har jo sjølvsagt lyst til å koma i posisjon, men no gjeld det å prøva og finna andre med dei same verdiane, fortsette ho.

SP med Veronica Thorkildsen Thorsen:

1. – Det har vore ein spanande kveld. Me har gått litt ned, men det er i grunn som forventa med tanke på at me hadde eit brakval ved førre val. No er me alt i alt godt nøgde med fem mandat i kommunestyret, fortalde Thorsen måndag kveld.

2. – Det blir spanande å sjå kven som finn i lag. Me får uansett ein tydeleg posisjon i kommunestyret med mandata våre, sa ho vidare.

Høgre med Vegard Bjørnevik:

1. – Me helde stand, dette er det sjuande valet me er det største partiet. Me gjekk også pitte litt opp sidan førre val, så me er kjempenøgde. Eg vil også sei at eg er kjempestolt over Høgre-gruppa for jobben dei har gjort denne valkampen. Veljarane har gjeve oss det me fortener, sa Bjørnevik måndag kveld.

2. – Det blir drøftingar i morgon, og det er Leif Sverre (Enes) som er leiaren for oss der. No skal me la valnatta synka inn, så ser me det an, fortsette han.

SV med Silje Nordtveit Olsen:

1. – Me er nøgde med tre representantar, det er lenge sidan me hatt så mange mandat. Det er jo alltid mogeleg å håpa på betre, men me gler oss til å ta fatt på jobben i kommunestyret med dei tre, svara Olsen måndag kveld.

2. – Me har vore tydelege heile vegen, me kjem ikkje til å samarbeida med verken FrP eller Høgre, og det skal veljarane våre stola på. Dei skal kunne stola på oss, understreka ho.

FrP med Ove Lemicka:

1. – Det er jo spesielt, me har gått fram men ikkje fått den utteljinga me skulle ønska. Det er heilt tydeleg at inntoget til INP har råka både oss, AP og SP. Det er jo på ein måte det som skjer, sjølv om finteljinga føregår og det kan koma endringar i løpet av dagen. Noko meir veit me ikkje endå, me berre registrerer det som skjer, sa Lemicka tysdag morgon.

2. – Eg har fått med meg at det allereie er sonderingar på gong mellom nokon, det er litt spesielt kanskje at Høgre vel å gå til valtaparane AP, SP og så KrF. Ei vurdering som Høgre tydelegvis gjer er at det gamle er betre enn å få til eit borgarleg samarbeid. Me får sjå kva som kjem ut av det, endelege mandat er jo ikkje fastsett, det vil ein finna ut i løpet av kvelden. Slik er demokratiet og me må sjå framover, svara han vidare.

KrF med Alf Jarle Langeland:

1. – Me fekk inn to mandat, noko me hadde håpa på. Det var gjerne litt vel optimistisk å håpa på eitt til, men me er godt nøgde med dei to, sa Langeland tysdag føremiddag.

2. – Me er inviterte til samtalar i kveld, så då får me sjå. Me veit ikkje noko sånn veldig konkret akkurat no, men me har i alle fall nokre idear. No har jo ikkje eg vore borti dette før, så då er det kjekt å ha folk å støtta meg på. Eg tenkjer at sidan Høgre er så store som dei er, så er det naturleg at dei får ordføraren, men kven som får vara er gjerne meir uklart. Det vil forhandlingane syna, svara han vidare.

MDG med Jostein Saghaug:

1. – Fyrst og fremst vil eg takka alle som stemte på oss og som tykkjer at me har ein god politikk. Me er takksame for alle som støtter oss. I forkant såg me at me kunne venta oss mellom èin og tre representantar, men sjølvsagt skulle me ynskja å bli verande med to mandat i kommunestyret, sa Saghaug på telefon tysdag morgon.

2. – Fyrst og fremst så må me veta kven som kjem inn. Det veit me ikkje før etter klokka 18 i kveld, så me er spente på det. Me ser jo at det føregår forhandlingar som me ikkje er ein del av. Alle snakkar med alle, men me er førebels ikkje med i noko forhandlingar. Det me kan lova er at me skal gjera så godt me kan for å få dei om styrer til å gjennomføra god MDG politikk, svara han vidare.

V med Kent Are Kjørstveit Petterson:

1. – Det var ein nervepirrande kveld det der. Ser ut til å vera inne med eitt mandat, det er jo positivt. Så me er veldig glad for det, fortalde Petterson tysdag føremiddag.

2. – No sonderer me terrenget litt og avventer litt på finteljinga for å sjå om det blir nokre endringar, sjølv om det ikkje heilt ser sånn ut. Me er opne for å samarbeida med dei fleste, anten på plattforma eller valteknisk. Me vil uansett takka dei som har stemt på oss og me skal gjera det me kan for å løfta fram politikken så godt me kan dei nest fire åra, fortsette han.

INP med Jostein Rødland:

1. – Me har vore ganske spente. Me fekk jo gode målingar i sommar, me var jo litt usikre på korleis det ville gå likevel. Det er fyrste gong INP stiller til lokalval, og for eit nytt parti er det bra med så stor oppslutning, sa Rødland måndag kveld.

2. – Me skal ha eit strategimøte med leiinga i morgon, før me avgjer noko. Me er jo nye i faget, så me må roa oss litt ned, tenka oss om og sjå på moglegheitene, fortsette han.