– Det er ikkje så ofte ein har høve til det her
Måndag føremiddag nytta nokre elevar frå Rosendal ungdomsskule høvet i det vakre vintervêret til å finna fram skeisene, og fekk nokre flotte timar i Baronihagen.
Så langt har 2024 vore ein kald og frostig affære, men det er ikkje berre negative sider ved akkurat det. Noko alle skeiseglade kringom både kommunen og landet elles kan syne til.
Fleire har i desse dagar børsta støv av skeisene og teke turen til næraste eigna vatn, nettopp det gjorde også 8. klasse friluftsliv valfag frå Rosendal ungdomsskule måndag føremiddag på Paddedammen i Baronihagen.
Annonse
Positivt overraska
– Me planla det ei gong tidlegare også, men då vart det ikkje noko av då det plusteleg kom mykje snø. Så då vart det aking i staden for, men denne gongen fekk me det til. Dette er den einaste staden der me kan gå på på skeiser som me kan gå til, og det er utruleg kjekt å sjå alle som koser seg på isen, fortalde valfagslæraren Christoffer Fossli.
– Skulen har jo sjølvsagt ein del utstyr som elevane kan låne, men eg vart positivt overraska over kor mange som faktisk hadde skeiser heime. Det er jo ikkje så ofte ein har høve til det her i Kvinnherad, og det er noko eg saknar frå der eg vaks opp då eg sjølv er veldig glad i å gå på skeiser, la den tilflytta kvinnheringen til på velklingande austlandsk.
Og kosa seg gjorde dei, anten dei hadde skeiser på beina eller ikkje. Dei fleste hadde ishockeyskeiser, nokre hadde kunstløpsskeiser, éin elev hadde til og med valt lengdeløpsskeiser, medan nokre få valde å bruka skoa.
Annonse
– Me er glade for at det var nok is til at me kunne gå på skeiser, det er veldig kjekt, sa jentene som akkurat då tok seg ein liten pust i bakken.
