– Det er ikkje noko mål at bygga våre skal bli 800 år

– Då har vi hatt ei rekordkort orientering. Det plar ofte gå éin og to timar.

Ordførar Vegard Bjørnevik (H) konstaterte starten på møtet gjekk mykje raskare enn vanleg.

– Det er ikkje så lenge sidan sist, så det er ikkje så mykje å orientera om.

Kommunedirektør Leif Ove Mikkelsen hadde i mente at det berre var to veker sidan førre kommunestyremøte.

– Sjølv om dei var korte, så veit eg at de jobbar mykje innimellom likevel.

Synnøve Solbakken (Ap) rekna ikkje med varigheita på orienteringane hadde samanheng med kor mykje ordføraren og kommunedirektøren jobbar.

– Det blir pinnekjøt klokka 13.30, så vi kjem til å vera godt svoltne då. Det kjenner i alle fall eg.

Vegard Bjørnevik syntest det verka lenge til matpausen.

– Då går Synnøve glipp av pinnekjøtet.

Ordførar Bjørnevik fortalde at Synnøve Solbakken hadde søkt permisjon frå klokka 13.00.

– Kvinnherad må vera synlege og til stades.

Synnøve Solbakken oppmoda om å engasjera seg i det nye vegselskapet Stavanger to Bergen.

– Det var min partikollega som fekk meg til å ta ordet.

Øyvind Hardeland (Ap) er mogleg ikkje like entusiastisk til Hordfast som førre talar.

– Det er flott vi skal vera med. Men no trur eg vi må reisa oss og seia «skal vi vera med, så må vi òg få ei tilknyting».

Hardeland var meir oppteken av innkorting av ferja til Stord.

– Godt dåke er samkoordinerte.

Vegard Bjørnevik trøyta både Solbakken og Hardeland med at han vil stilla krav om betre kommunikasjonar.

– Heldigvis har ikkje vi stelt oss slik som Stord gjer.

Knut Johannes Helvik (H) ynskjer forståeleg nok ikkje å kopiera Stord. Denne gongen gjaldt det mottak av flyktningar.

– Vi er fortsett inne i det fantastiske Aventia-systemet, så eg er tolmodig når eg ser nokon trykkjer febrilsk.

Ordførar Bjørnevik omtalar no konsekvent det digitale saksbehandlings- og røystesystemet som «det fantastiske», ikkje utan ein betydeleg grad av ironi.

– Eg trudde eg var teknisk, men ikkje denne gongen.

Veronica Thorkildsen Thorsen (Sp) sleit med å få teikna seg på talarlista.

– Då trykkjer eg på favorittknappen.

Det enklaste for ordførar Bjørnevik er når alle er samde og han kan melda inn «Samrøystes» i systemet.

– Då er vi tilbake etter ein liten beinstrekk, kanskje ein kaffitår og noko godt attåt. No høyrest eg ut som eit Alf Prøysen-vers, men tek ingen sjølvkritikk for det.

Vegard Bjørnevik vart lyrisk etter å ha fylt opp kaffikoppen.

– Alt er gjort i ei hattaføykja, for vi hadde dårleg tid.

Beredskapssjef Gunn Tove Petterteig hadde det travelt med å laga uttale om kraftleidningen.

– Eg må innrømma at eg ikkje har lese heile reglementet, men eg har lese nok til at vi bør senda det attende til administrasjonen.

Jostein Saghaug (MDG) fann ein del feil i forslaget til politisk reglement.

– Og så kan eg avsløra for Kommunestyret at det er lite med medaljar her i garden. Enno.

Vegard Bjørnevik vedgjekk at han ikkje er tildelt medaljar som han kan pynta dressen med.

– Aksel Kloster sa han hadde fått laga seg eit lite varaordførarkjede som han skulle bruka ved høvande anledningar.

Ove Lemicka mimra attende til den gong kommunen fekk overrekte ordførarkjeda, og hugsa at dåverande varaordførar Aksel Kloster sjølvsagt hadde ein replikk på lur.

– Eg heldt på å detta, så eg må berre henta meg inn igjen.

Thea Vaage (Ap) snubla på veg til talarstolen.

– Vi kan ikkje ha sånne ordvekslingar mellom ordførar og ein representant, så no må vi bli ferdige.

Vegard Bjørnevik måtte irettesetja Jostein Saghaug.

– Til orientering så har heile Senterpartiet bestilt seg tur til Oslo 16. januar.

Ingve Hesjedal (Sp) følte ikkje for å leggja inn eit ekstra kommunestyremøte den dagen.

– Og så kan eg opplysa at Gustav, son min, har bursdag 16. januar.

Heller ikkje Vegard Bjørnevik ynskjer noko møte den dagen.

– Januar har vore møtefri, og det er fleire som har lagt opp Asia-turen sin då.

Ove Lemicka hadde sine grunnar for å unngå møte i januar.

– Klart at når Senterpartiet reiser til Oslo og Gustav har bursdag, så må Kommunestyret ta det innover seg.

Ordførar Bjørnevik var glad forslaget om ekstramøte vart stemt ned.

– Då har eg mista den Aventiaen.

Varamann Ole Bjarte Røssland (Ap) mista sambandet.

– Kjekt å lesa i avisa at Anders Næs er tilset som ny regionleiar i MOT.

Veronica Thorkildsen Thorsen gler seg til at regionleiaren vil vitja Kvinnherad.

– Med ein sjukepleiar sitt kyndige blikk, kan eg ikkje unngå å ynskja kommunedirektøren god betring. Han har eg sete og kikka på i heile dag.

Gunn Marit Flatland (H) observerte at kommunedirektøren ikkje var i form.

– Eg vil gje deg ei lita oppmoding om å halda deg til det du har sendt inn på førehand.

Vegard Bjørnevik har opplevd før at Per Svindland ikkje alltid følgjer det han sjølv har skrive i innsendte spørsmål.

Budsjettglyttar

– Eg ynskjer ein pitte-liten Time-Out.

Vegard Bjørnevik kalla fram gruppeleiarane for å avklara korleis talarlista i budsjettdebatten skulle organiserast.

– Vi vil synleggjera kommunen og bygdene betre enn i dag.

Knut Johannes Helvik fortalde at det blir sett av 200.000 kroner til marknadsføring.

– Du får gå inn for landing snart.

Vegard Bjørnevik noterte seg at Helvik snart hadde snakka i dei tilmålte sju minutta.

– Gå inn for landing, ja. Men eg kan jo koma opp igjen sjølvsagt.

Knut Johannes Helvik hadde meir på hjarta.

– Det er eit så kraftfullt tiltak at Kvinnherad kjem til å vera i norgestoppen i satsane for sosialstønad etter dette.

Per Harald Havnen Löfgren Johansen (Ap) gler seg over løftet i sosialhjelpa.

– No er det ikkje noko mål at bygga våre skal bli 800 år.

Alf Jarle Langeland (KrF) tok til orde for vedlikehald av kommunale bygg og samanlikna med kyrkja i Rosendal.

– Det er litt utfordrande å tala etter Langeland.

Inger-Elin Nesheim nådde ikkje opp til mikronfonhøgda som Alf Jarle Langeland etterlet seg.

– Vi skulle sjølvsagt ynska vi hadde større handlingsrom, men vi var tidleg einige om at vi måtte å utvisa moderasjon.

Også Maren Skogseth (V) var nøgd med budsjettet og forhandlingane i forkant.

– Det er frykteleg kor fort 420 sekund går.

Knut Johannes Helvik tykte den fyrste taletida hans gjekk veldig raskt.

– Er det éin ting eg har lært meg, så er det at ordførar bestemmer.

Per Harald Havnen Löfgren Johansen ville ikkje yppa seg mot Vegard Bjørnevik.

– Det er ein spennande dag for Kvinnherad kommune. Vi skal behandla årets viktigaste sak.

Silje Nordtveit Olsen (SV) minna om alvoret som kvilte over møtet.

– Rett og slett for å finna rom til svært viktige investeringar.

Jostein Saghaug (MDG) ynskjer å innføra eigedomsskatt igjen.

– Eg er stolt av forslaget vi har lagt fram.

Silvia Tofte (H) var som fleire andre strålande nøgd med budsjettet.

– Eg vil skryta av Framstegspartiet. Det er ein fantastisk god idé å prøva å forskottera prosjektet kommunalt. Eg har lyst å seia det no, i tilfelle Frp sitt budsjett ikkje vert vedteke.

Svein Åge Vangdal (Sp) støtta forskottering av ferjekai på Skjelnesodden, men var nok trygg på at Frp ikkje ville få fleirtal for budsjettet sitt.

– Vi som no er det største partiet i landet på meiningsmålingane, vi får visa storsinn.

Ove Lemicka (Frp) følte han kunne bera over med at koalisjonen ikkje inviterte Frp med i budsjettforhandlingane.

– Vi er glade for at koalisjonen no tek inn Merkur-butikkane, som er ei viktig sak for oss.

Veronica Thorkildsen Thorsen og Sp føreslo å løyva tilskot til dei små daglegvarebutikkane, noko dei fekk gehør for.

– Det er ein veldig lettvint bruk av begrepet «kupp».

Per Harald Havnen Löfgren Johansen reagerte på at Jostein Saghaug meinte koalisjonen hadde kuppa budsjettet.

– Vi har alltid ein Plan B, og ser at vi ikkje kan få i pose og sekk.

Heidi Bolette Jakobsen (INP) måtte finna seg i at det ikkje gjekk an å røysta mot alle budsjettforslag.