– Det er eit slag i trynet for oss

Statnett-styret vil innføra ein flat rabatt på 50 prosent på industrikundane si nettleige frå 2022. Det kan bety eit tap på 250 millionar kroner for Hydro sine aluminiumsverk.

– Vi har ikkje eit eksakt tal på kva dette vil bety i kroner og øre for Hydro Husnes. Men når vi ser på korleis det var og korleis det førre Statnettregimet prissette og rabattiserte industrien, kontra korleis det vil bli i 2022, så snakkar vi eit samla tap på 250 millionar kroner for Hydro. Ein kvart milliard, det er enorme summar og heilt ufatteleg, seier tillitsvald Ørjan Normann ved Hydro Husnes.

Irritert på dugnad

Styret i Statnett vedtok i førre veke å gjera fleire endringar på dagens tariffmodell, blant anna ved at industrikundane sin rabatt blir utjamna ved at alle frå 2022 vil få 50 prosent rabatt. Det kom fram i ei pressemelding der Statnett også offentleggjorde at dei som følgje av koronakrisa ville redusera nettleiga for 2021 med 20-25 prosent samanlikna med 2020. Ein del av den nasjonale dugnaden, skriv Statnett sjølv. Eit utsegn som får Normann til å reagera.

– Når dei bruker eit ord som dugnad på ein rabatt som vi må betala tilbake med renter etterpå, så er det provoserande. Det er eit hån mot den dugnadsanda som Norge og nordmenn har vist gjennom covid-19-pandemien, seier Normann.

– Forskjellsbehandling

Han reagerer også på at Statnett bruker regelverket som argumentasjon på nettariffauken.

– Dei seier at dei skal forhalda seg til eit regelverk. Men sjå på Tyskland for eksempel, som gir 90 prosent rabatt og likevel held seg innanfor EU sitt regelverk. Ein rabatt vi også hadde fram til 2018, seier Normann og legg til:

– Det er eit slag i trynet, det er heilt klart. Det er heilt utruleg, eigentleg. Vi bed ikkje om så mykje, verken statlege subsidiar eller anna. Vi bed berre om at ein skal nytta seg fullt ut av det handlingsrommet som er innanfor EU sitt regelverk. Med denne endringa så er det ei klokkeklar svekking og forskjellsbehandling for oss i konkurransen mot internasjonale selskap i den same marknaden.

Jobbar knallhardt for opning

I ei pressemelding frå Hydro fortel direktør Ola Sæter i Hydro sine metallverk at endringa skapar ein ekstrabyrde for Hydro og norsk aluminiumsindustri. Han seier at det er dramatisk for deira metallverk langs kysten, og at det skapar ein usikkerheit for lokalsamfunna som vert råka.

– Vi har investert milliardar dei siste åra for å utvikla norske metallverk. Dette har vi gjort basert på ei tru på framtida for norsk aluminium som eit viktig bidrag til det grøne skiftet, og ei forventing om at dei rammevilkåra som har gjort det mogleg skulle vidareførast, seier Sæter i pressemelding.

Blant dei store investeringane til Hydro finn vi gjenopninga av B-hallen på Husnes. Ei opning som på grunn av koronapandemien er utsett til i slutten av årets tredje kvartal. Kva endringa i rammevilkåra har å seia for gjenopninga, er framleis usikkert.

– Vi jobbar knallhardt for oppstart av B-hallen. Vi er no klare til å starta, men alle svekkingar av rammevilkår vil gjera det trongare for vår industri. Om dette vil har direkte påverknad på B-hallen veit eg ikkje. Men vi jobbar no knallhardt for oppstart når marknaden og rammevilkåra tilseier at vi kan opna, seier Normann.