– Det er ein veldig fin gjeng, som tør å gå inn i dei vanskelege sakene

Medlemmene i kontrollutvalet hausta mykje ros i kommunestyremøtet.

Blant sakene i kommunestyret førre veke var årsmeldinga til kontrollutvalet. I den samanheng fekk leiar Knut Førland (MDG) halda ei innleiing. Han slo fast at Kvinnherad kommune har eit svært godt kontrollutval.

– Det er ein veldig fin gjeng, som tør å gå inn i dei vanskelege sakene, roste Førland.

Han valde å gje ekstra ros til to av medlemmene.

– Eg vil spesielt framheva nestleiar Ellinor Rein. Det er ein dyktig politikar, og i kontrollutvalet har ho gjort ein strålande jobb. Eg vil også trekkja fram varamedlem Irene Nielsen-Sjo, som på grunn av sjukefråvær har møtt fast over ein lengre periode, og det er vi glade for. Ho er ein erfaren politikar, og gjer ein veldig god jobb i kontrollutvalet, sa Førland.

Han takka òg alle medlemmene for vel utført arbeid i 2022.

– Ikkje minst har dei hatt fokus på saker som ein gjerne kunne tenkt seg å lagt ned i ei skuff. Men det har ikkje kontrollutvalet gjort, fortalde Knut Førland.

Har vore ei glede

Utvalet hadde fem møte i fjor og behandla 41 saker. To av dei var ekstra omfattande.

– Den eine har vore tema i heile valperioden, det gjeld Kvinnherad Vekstbedrift. Det har vore ei tung sak og ei viktig sak, og som har kravd mykje arbeid, opplyste han.

Den nest største saka gjaldt gjennomgangen av kommunen sine varslingsrutinar.

Irene Nielsen-Sjo (Ap) sendte noko av rosen tilbake til Førland.

– Det har vore ei glede å sitja der. Eg vil takka Knut Førland for vel gjennomførde møte. Det er nok hans leiarskap som har gjort at vi har vore eit så velfungerande råd, kommenterte ho.

Også andre politikar ynska å heidra kontrollutvalet.

– Eg vil berømma dei for den flotte innsatsen dei gjer for kommunen. Førland, du har ei dyktig leiing i kontrollutvalet og veldig gode medlemmer som er med, sa Hege Lægreid Røssland (SF), og var spesielt nøgd med at utvalet gjekk såpass grundig inn i varslingsrutinane.

Eit av dei beste

Også Gaute Lund (SF) la vekt på varslingsrutinane.

– Varslingssaker skal heretter behandlast administrativt, men eg trur vi er samde om at det er kontrollutvalet som bør laga retningslinjer for korleis dei skal behandlast. Eg trur ikkje dette er ei sak kommunestyret skal sleppa så lett, analyserte han.

Jostein Saghaug (MDG) føya seg inn i rekkja at dei som ville rosa utvalet.

– Eg synest dei har gjort ein utmerka innsats, og hatt oppe saker som krev styrke, mot og enormt med jobb, sa han.

Saghaug er framleis uroleg for varslingsrutinane til kommunen, og undra om ein kunne vurdera eit interkommunalt samarbeid, slik at det ikkje vert tilsette i Kvinnherad kommune som skal handsama varslingssaker. Han fekk ikkje svar i møtet, men ordførar Hilde Enstad lova at innspelet vart notert.

Gunnar Våge (Sp) gjekk kanskje lengst i rosen.

– Det er farleg å seia at det er det beste kontrollutvalet vi har hatt, for då kan vi risikera å gløyma dei som har vore før, men at det er eit av dei beste trur eg vi kan stå inne for, smilte han.