– Det er dette som er framtida

Butikksjef Raymond Johansen kunne fortelje om spanande planar for den relativt nye butikken.

Hoppar på

– I samband med det nye kamerasystemet me har, så er det eit slikt smart-intelligenssystem. Eg trur me er fyrste Bunnprisbutikken med eit slik system, så me er på ein måte ein slags testbutikk for det. Systemet er tillaga for at me kan ha ein ubemanna døgnope butikk. Eg har vore frampå der med Bunnpris og ynskjer å vera fyrste butikk med det, fortalde Johansen.

– Eg har litt trua på det med tanke på at det kjem ferjer inn etter at butikken er stengd, og det er gjerne mykje turistar her på sommaren. Rett nok må det sjølvsagt vera eit godt nok system slik at det fungerer og ikkje har noko risiko. Vår dataleverandør jobbar no med mange løysingar, så det er eg frykteleg spent på. Viss me får den mogelegheita, så hoppar me på, understreka den engasjerte butikksjefen.

Likevel forstår han at enkelte butikkar vel å leggja ned sjølvbeteninga.

– Eg forstår at dei tek eit val så lenge det er ein byrde for butikken, då har dei eigentleg berre eitt val. Elles renn pengane ut. Det er ein evig kamp for å tena inn pengar og koma seg i overskot, men ingen i Norge som driv eit føretak kan driva i minus, poengterte han.

– Må sjå kva som skjer

Mindre enn i Bergen

Vidare var han klar på at det på ingen måte skal bli dårlegare sørvis på Seim sjølv om dei skulle tilby ubemanna opningstider.

– Eg trur det er dette som er framtida, det betyr likevel ikkje at me skal kutte av timane i sørvistilbodet. Men dersom ein treng å kjøpa seg noko nattmat eller Paracet til sjuke born, så er det ein mogelegheit. Det er i alle fall det som er tanken, seier Johansen.

– Så de har ikkje opplevd noko auka problem med svinn eller steling?

– Mindre avvik har me, men ikkje nok til at me skal kutte ut sjølvbeteningskassane. Det har aldri vore store uregistrerte svinn, verken i gamlebutikken eller her no. Sjølvbeteningskassane på Seim er i alle fall komne for å bli, konkluderte han.

– Dei fleste av dei avvika me har trur eg rett og slett kjem av misforståingar eller at folk forgløymer seg. Eg vil absolutt ikkje påstå at me har noko problem med at kundane stel. I tillegg trur eg at folk på bygda er mykje meir ærlege enn det ein er i byn, sa Johansen.

– Då eg jobba som distriktssjef såg eg at butikkane i Hardanger hadde mykje mindre uregistrert svinn enn til dømes butikkane i Bergen. Der var det mange butikkar som sleit med mykje steling, la han til.

Ynskje til kundane

Den nøgde dagelege leiaren fortalde om gode og ærlege kundar som kjem tilbake etter å ha oppdaga feilskanning på kassalappen, eller ein annan kunde som fekk ut ein pakke sigarettar for mykje frå Vensafe-maskina og gav beskjed.

– Alle andre stader der eg har drive butikk så hadde eg eigentleg ikkje forventa det. For det er lett å tenkja at to pakkar røyk for prisen av ein det går fint, men ikkje her. Her er dei ærlege og kjem faktisk tilbake og seier i frå, og det set eg enormt pris på, understreka Johansen.

Likevel kom han med eit ynskje til kundane.

– Me har jo det me kallar for flytande behaldning og me har ofte vareteljing, då ser me gjerne at mange ikkje skannar alle dei ulike varene. Til dømes dersom me har tilbod på mellombar, då kostar alle produkta 15 kroner. Då er det kanskje ein kunde som tek tre av kvar type, men når dei så kjem i kassa skannar dei berre éin pakke gonger tolv, fortalde Johansen.

– Dei tenkjer gjerne at det er same pris og ikkje spelar noko rolle, men for oss blir det veldig feil i og med at me har eit flytande varesystem. Viss ein tek éin solo og éin cola, men skannar inn to solo, så blir det feil i behaldninga vår og då bestiller også systemet feil, forklarte han avslutningsvis.

– Det er berre greie gutar og jenter som har teke eit dumt val

– Folk er stort sett ærlege her