– Det er det som er gøy med å driva butikk
Det er lange dagar på butikksjef Mona Yvonne Olufsen som den siste tida har halde på med å få den nye butikken på Husnes, Normal, klappa og klar til opning. Og framleis er det mykje å gjera før fredag.
– Me må vera ferdige seinast tysdag, for på onsdag blir det boning her inne, fortel ein noko stressa Olufsen då Grenda snakka med ho torsdag føremiddag.
Heldigvis er ho langt i frå åleine om arbeidet. Saman med Olufsen er ikkje berre resten av dei tilsette som skal byrja å jobba der, men også eit par ekstra hender frå Bergen i tillegg til eit team frå Danmark. Den danske butikkjeda har eit eige team som reiser rundt for å hjelpa nye butikkar i gong.
Annonse
Nyfiken
Så då Grenda tok turen innom var det summande aktivitet i lokalet av folk som bar varer og kassar både hit og dit, samt uhorveleg mange pallar med varer som stod og venta på å bli oppakka.
– Totalt har me denne veka fått levert 80 pallar med varer, om ikkje det er meir. Men me har fått gjort utruleg mykje sidan måndag, fortel den nye butikksjefen.
– Kva er som kjem til å skje på fredag då?
Annonse
– Då blir det opningsfest med «goodiebags» og litt forskjellig. Normal plar laga eit godt show utav slike ting, så eg håpar at det kjem masse folk, seier Olufsen.
Då nyhendet om den nye butikken kom og det var lyst ut stilling etter dagleg leiar, vart Olufsen nyfiken.
– Eg vart fyrst tipsa om jobben av andre, så etter ein samtale med regionsleiaren vart eg overtydd om at dette var noko eg ville. Det eg likar med konseptet er at det ikkje er så fastlåst som det kan virke, det er faktisk ganske fritt, fortel ho smilande.
– Det er lov og tenka sjølv, vera kreativ og eksperimentere med podia. Det er jo det som er det gøyaste med å driva butikk, avsluttar ho.
