– Det er berre greie gutar og jenter som har teke eit dumt val
I likskap med både Bunnpris og Spar Uskedalen angrar heller ikkje Spar Husnes på valet om å ta i bruk sjølvbetente kassar, trass i periodar med større svinn enn andre.
Dagleg leiar Arne Lyssand forklarer at svinn er summen av alle varer som blir vekke, anten det er varer som ikkje kjem frå leverandører, varer som kjem med feil pris til oss, varer som me ikkje registrerer som kasta, eller varer som blir tatt anten bevisst eller ubevisst.
Manipulera
Annonse
– Men det er klart med sjølvbeteningskassar, så er det ein annan problematikk igjen der det er kunden sjølv om skannar alle varene. I og med at ein då har fleire val på varene. Ta til dømes bananer, ein kan velja mellom både økologiske bananer, vanlege bananer og vårt billigste alternativ som er First Price. Dei tilsette veit jo kva som er kva, men det er nok mange som ikkje tenkjer over det, sa den daglege leiaren.
Lyssand ser stort sett positive sider ved teknologien som i alle høve ser ut til å ha kome for å bli.
– No skil eg jo litt mellom desse tinga som skjer som eg kallar for bevisst og ubevisst, Det er jo klart at med all ny teknologi og nye mogelegheiter, så er det nokon som finn måtar å manipulera dette her på. Då snakkar me om ein bevisst handling, understreka Lyssand.
– Det er mange som spekulerer i dette her, fordi det er spanande eller dei blir utfordra på sosiale media. Då tenkjer eg på dei yngre forbrukarane, dei vil gjerne vera ein del av ei gruppe eller gjengmentalitet, dei tøffe gjer det og så blir ein utfordra eller vil gjere det sjølv, fortsette han.
Annonse
Vil ikkje svartmåla
– No ligg jo du ganske nærme både ungdomsskulen og vidaregåande. Må de innimellom driva litt opplæring og setja litt grenser på slike ting?
– Ja, både og. Ofte rundt skulestart kvart år så fylgjer me litt meir med, og ser at det stundom er ting som skjer der folk utfordrar kvarandre eller noko sånt. Men der har me veldig god dialog med lensmansskontoret og Are (Uppheim, journ. merk.) som er førebyggjande på ungdomsbiten der. I tillegg har me både utekontaktane og skulane der me tek ein prat og forklarer litt om konsekvensar og slikt, fortalde Lyssand.
– Som ung tenåring så tenkjer ein ikkje på ting slik som når ein bli eldre. Men ting som ein gjer no kan få konsekvensar seinare òg. I tillegg snakkar eg også med veldig mange kjekke foreldre, og me ordnar ting på ein grei måte der tilfella krev det. Det er berre greie gutar og jenter som har teke eit dumt val der og då, så dette løyser me veldig greitt, fortsette han.
Lyssand påpeiker at problematikken med steling i all hovudsak gjeld eit fåtal.
– Det er på ingen måte noko grunn til å svartmåla dette her. For vår del så har me seks kassar, dei er eit veldig godt alternativt supplement spesielt rundt lønsjtider når me har ein del kundar innom. Det gjer at me har mogelegheit til å hjelpa dei kundane som har behov for hjelp på ein heilt annan måte enn at det står 19 kundar i kø som skal ha ei tyggispakke og ein energidrikk, poengterer han.
Annonse
– For vår del fungerer dette her veldig godt, avsluttar han.
