– Det er berre å møta fram

Grenda har blitt kontakta av fleire som ynskjer å vera med dampskipet «Stord I» på tur i neste veke, men som tykkjer det er vanskeleg å skaffa seg billettar på internett. – Ingen problem, folk kan kjøpa billettar om bord, opplyser Harald Kvinge.

I neste veke skal Stiftelsen D/S Stord I og Grenda arrangera to opne turar i kvinnherske fjordar. Onsdag 11. august går ferda frå Sunde til Høylandssundet, Fjelberg, Sæbøvik og attende. Torsdag 12. august går skipet frå Rosendal, inn Maurangerfjorden og attende. Sjølv med koronarestriksjonar er det plass til 60 passasjerarar på kvar av turane. Ein treng ikkje vera abonnement av Grenda for å vera med.

Hittil har det berre vore billettsal på internett. Men sidan så pass mange ikkje har erfaring med slikt, har ein no valt å gjera deltakinga så enkel som mogleg.

– Det går heilt greitt å kjøpa billettar om bord. Ein treng heller ikkje noko førehandspåmelding, det er berre å møta fram på snøggbåtkaien på Sunde eller industrikaien i Skålafjæro. Vi har plass om bord til alle som vil vera med, seier Harald Kvinge, styremedlem i stiftinga og billettør på «Stord I».

Dampmotor

Førebels ser vêrmeldingane svært lovande ut, men Kvinge opplyser at båten vil gå nærast uansett vêr.

– Naturen viser seg jo på ulikt vis, og vi kan aldri garantera sol og skyfri himmel. Men sjølv om naturen er heilt fantastisk på desse turane, må ein også hugsa at båten i seg sjølv er ei oppleving, og det er fyrst og fremst den som gjer at folk vil vera med. Passasjerane får gå over alt om bord, frå maskinrommet med dampmotoren til salongane og styrhuset. Vi skal ha mykje dugnadsfolk med på desse to turane, og dei er svært glade i å fortelja om båten, lokkar Harald Kvinge.