Det er berre å ausa, no får du vrakpant på fritidsbåten din

– Ved å samle inn og behandla båtar som skal kasserast, hindrar vi at menneske og natur blir eksponerte for farlege miljøgifter og mikroplast frå båtar som blir etterlatne. I tillegg vil materialgjenvinning og energiutnytting av båtane gi reduserte klimagassutslepp og andre positive miljøeffektar, skriv Kvinnherad kommune i ei kunngjering.

Tilskotsordninga omfattar båtar som er brukte til sports- og fritidsbruk med skroglengde inntil 49,21 fot (15 meter). Dette inkluderer òg mindre fartøy som kajakk, kano, seglbrett, gummibåt med skrog og liknande. Båtar brukt til næringsverksemd fell ikkje inn under ordninga.

Kommunen sitt mottak

Små fritidsbåtar, inkludert mindre fartøy, kan leverast til kommunen sitt mottak. Her kan òg mindre fartøy leverast. Større båtar og båtvrak på inntil 49,21 fot (15 meter) kan berre takast imot av enkelte avfallsmottak.

Det næraste mottaket ditt for fritidsbåtar finn du på Sortere.no. Her får du eit kart over dei ulike mottaka og kva båttypar og -storleikar dei tar imot.

Framgangsmåte for å få utbetalt vrakpant og meir informasjon om ordninga finn du på Miljødirektoratet sine heimesider.