Det blir løveleikar i år òg

Dei siste fem-seks åra har Lions Kvinnherad og Trio samarbeida om løveleikane. Når Lions la ned i fjor haust tok Trio over leikene.

– Det var Lions som starta opp det heile, og dei siste åra vart det arrangert i lag med Trio Friidrett. I år er Lions Stord med og hjelp til, og vi håpar jo på at karane som var i Lions Kvinnherad vert med i år òg, fortel Are Ulseth i Trio.

Løveleikane er eit friidrettsstemne som skal vera eit lyspunkt i kvardagen. Deltakarane får kjempa i løp, kast, hopp og andre aktivitetar på ulike måtar. Dei får òg moglegheit til å testa ut Boccia-dugleiken sin, ifølge Trio sine heimesider.

Forventar godt oppmøte

I fjor var løveleikane arrangert same helga som NFU (Norsk Forbund for Utviklingshemma) sin sommarleir på Halsnøy.

– Normalt har vi vore om lag 40 deltakarar, men i fjor var vi nesten 100. Vi har pleidd å ha løveleikane litt tidlegare på året, men det var så fint å ha det samstundes med avslutningshelga til NFU at vi gjer det slik i år òg, fortel Ulseth.

«Leikane vert høgtidleg opna og innmarsjen vil bli akkompagnert av korpsmusikk. Medan leikane går av stabelen vil både Løva, Høna og Haren vera med å spreia glede og motivasjon til både små og store. Funksjonærane vil losa deltakarane sikkert gjennom dagen», heiter det på Trio sine heimesider.

Fekk flott gåve

Trio Friidrett fekk 60 000 kr til løveleikane frå Sparebank1-stiftinga Kvinnherad i slutten av april. Desse pengane kjem godt med.

– Vi har eit mål om at løveleikane skal vera gratis for deltakarane. Det er ei gruppe som kanskje ofte blir hindra frå å delta grunna kostnadene, og slik kan vi ikkje ha det, fortel Ulseth.

Sjølve arrangementet er ikkje så kostbart, men med utdeling av t-skjorter, medaljar og diplom i tillegg til mat og drikke vert det nokre utgifter.

– Gåva frå Sparebank1-stiftinga gjer at vi er dekka for to år, så det er veldig flott. Det set både vi og deltakarane stor pris på, fortel Ulseth.

«Vi håpar at dagen kan blir ein gladdag som vil gje deltakarane mykje glede og som dei vil minnast lenge», skriv Trio på heimesidene sine.