– Det blir ikkje fleire til å løysa utfordringane
Med stadig dårlege søkjartal til lærarstudiet, er mangelen på lærarar ei kjend problemstilling. Også her i Kvinnherad, i fylgje sektorleiar for omsorg Heidi Særsten Solheim.
Etter både hovudrunden og ei andregongsutlysing er det framleis skular som manglar lærarar til det komande året.
– Etter hovudrunden hadde me etter tilhøva ganske mange søkjarar, men ikkje nok. Difor hadde me ei andregongsutlysing etterpå. Problemet er at me får ikkje nok faglærde lærar, og eg ser at det framleis er skular som ikkje har fått på plass lærarar for året, fortel sektorleiaren.
Annonse
– Dette handlar også om interne ting. Når me søkjer etter ny avdelingsleiar så er det gjerne interne søkjarar. Då blir det litt stolleik. I tillegg er det 22 lærarar som har fått innvilga vidareutdanning, og ein stor del av dei skal då ha vikarordning. Noko som betyr at dei får redusert stilling og me må setja inn vikarar, legg ho til.
Meir kompleks
Solheim tenkjer også på korleis dei skal klare å halda på dei lærarane dei allereie har.
– Éin ting er å rekruttera nye, men me må også leggja tilhøva til rette for å vera ein attraktiv arbeidsgjevar og klarer å behalda dei me har. Her blir det ein balanse når me ikkje får tak i nok folk, for det blir jo meir strevsamt for dei som då står i det. Me må rett og slett tenkja smartare for framtida, understrekar Solheim.
Annonse
Slik det er i dag så har alle nyutdanna rett på rettleiing ved at alle får sin rettleiar på skulen der dei også har planar for korleis dette skal skje. Det vert også arrangert felles samlingar for alle nyutdanna i kommunen, men også på tvers av fleire kommunar.
– Overgangen frå skulebenken kan vera litt av eit sjokk. Samtidig var det jo litt av tanken for å utvida studiet til mastergrad at det skulle styrka profesjonen og berika lærarane for å jobba i ein skule som er blitt meir kompleks. Gjere dei betre rusta i høve både undervisningsfag òg jobba i djupna med masterfag, seier Solheim.
Hovudessensen
Ho påpeikar derimot at det ikkje berre er i skulen at ein slit med rekrutteringa.
– Rekruttering generelt er ei utfordring for fleire fagområde, og dette er noko som me har løfta opp på tvers av sektorane. Korleis kan me møta den nye framtida, der oppgåvene skal løysast men det er færre til å løysa dei. Hovudessensen er at det er ei utfordring, og det er noko me må tenkja på til framtida, poengterer ho.
– Det blir ikkje fleire til å løysa oppgåvene, og skular skal me ha. Sjølv om elevtala går ned, så er eg usikker på om det får noko konsekvens for tal på lærarar me treng. Og ikkje berre lærarar, men tilsette generelt, avsluttar ho.
