Gøril Guddal helsa velkommen til utstillingsopning. Her midt i mellom eit avslappa og figurpositivt kunstverk og dets skapar, Sindre W. Goksøyr. Bak heng Dunce-bileta til Jens K. Styve.

– Det beste seminaret eg har vore på på lenge. Eller nokon sinne!

Pauline Naterstad var glad ho tok turen til utstillingsopning og seminar hjå Galleri G Guddal denne laurdagen då striper i ulike former vart servert.

Jorun Larsen
Publisert Sist oppdatert

Førsteinntrykket var spenstig og leikent under opninga av haustutstillinga. Gøril Guddal har utmerka seg som ein vågal gallerist som gjev rom for litt meir ukommersielle utrykk dette året, noko som kler både ho og galleriet godt.

Truleg kan noko av vågestykket skuldast at ho har hatt lokalt næringsliv og Fritt Ord i ryggen denne gongen, medan resten kan forklarast med tryggleiken som finst i å stille ut kunst av Sverre Bjertnes, som sel godt, gjennom sommaren.

For det å stille ut dei rosa kama sutra-figurane til Sindre W. Goksøyr, som elsk deg sjølv-verket «Kjærlighet i koronaens tid», øvst i Guddal krev gjerne litt kroppshår.

(Dei som tek turen til utstillinga, eller som kjenner til Goksøyr frå før, vil forstå kva som meinast med det.)

– Dette kan nok vera litt kraftig kost på bygda, men her får ein berre svelgja unna, sa Gøril med blink i auga til Goksøyr då ho presenterte skulpturane og bileta hans under opninga.

Jens K. Styve reiste heile vegen frå Tromsø for å delta på seminar og utstillingsopning.

Teikneserie-ekspertar

Stjerneteamet som manns- og kvinnssterke møtte opp i Guddal for å stille ut teikningar, bøker, striper og skulpturar den første laurdagen i september er ettertrakta utøvarar innanfor sine uttrykksformer og fleire av dei dessutan prisløna for arbeida sine.

Rett og slett ein gjeng teikneserie-ekspertar, ifølgje galleristen.

– Nokon av dei har sin ekspertise som illustratørar og kunstnarar, andre gjennom ein meir teoretisk innfallsvinkel, sa ho under opninga.

Kunstnarane som no er utstilt er Lene Ask, Therese G. EIde, Jens K. Styve og Sindre W. Goksøyr. Med på laget var Fredrik Rysjedal og Erle Marie Sørheim, som leia publikum gjennom dagens seminar.

Eller tidenes seminar, som Pauline Naterstad meinte då dei vel to timane seminaret vara hadde gått.

– Litt av poenget med teikneseriar i aviser er at dei kan appellere til ei stor målgruppe, og mange kan jo relatere til småbarnslivet, sa Therese G. Eide under seminaret.
Erle Marie Sørheim (i midten) er kulturjournalist og forfattar, busett i Berlin. Ho har skrive boka Karikaturenes historie - fra hulemalerier til Charlie Hebdo, og hadde såleis eit godt grunnlag for å styra ordet under seminaret. Det hadde forøvrig panel-makkaren hennar Fredrik Rysjedal òg.
Teikneserieskaparar og -ekspertar fekk kvar si bok i gåve, Mine bilder av Sverre Bjertnes. F.v. Jens K. Styve, Erle Marie Sørheim, Lene Ask, Sindre W. Goksøyr, Therese G. Eide og Fredrik Rysjedal.

Eksotisk og eksklusivt

– Tusen takk for invitasjonen, berre turen over fjellet var eksotisk for oss, sa Sørheim under opninga.

Dei seks ekspertane som dernest stilte på rekke for å motta gåve for innsatsen, boka Mine bilder av Sverre Bjertnes, takka elles for særleg godt vertskap i Guddalstunet, før det bar opp på låven for teikneserieseminar.

Der fekk publikum ei innføring i teikneseriesjangeren, om korleis bølgjene innanfor formatet hadde endra seg gjennom dei siste 40 åra, og ein fekk koma tett på prosjekta som dei einskilde illustratørane eller teikneseriekunstnarane har jobba med så langt.

Samtalen tok mellom anna opp det sjølvbiografiske, som til tider er på grensa til sjølvutleverande. Her var Therese G. Eide ein god representant.

Hennar serie «Intet nytt fra hjemmefronten» handlar om livet som småbarnsmor, og det kaoset som kan opplevast i denne situasjonen.

På tjue månadar vart ho og mannen foreldre til tre ungar, så dette vart ei - til no - uuttømeleg kjelde for striper.

Fredrik Rysjedal i samtale med Therese G. Eide om teikneserieboka hennar Foreldreskapet.

– Det er ekstremsport

Det vart vidare stilt spørsmål til behovet for humor, arbeidsrutinar og intensjonar, og illustratørane fekk spørsmål om deira tankar rundt kunstig intelligens.

– Eg blir faktisk mest inspirert av kunstig intelligens, svara Jens K. Styve.

Han kunne elles informera om at juleheftet til serien hans Dunce skal ferdigstillast i løpet av september. Han hadde difor med seg iPad, slik at han kunne jobba litt samstundes som han deltok på seminar og utstillingsopning.

– Det er ekstremsport å teikna striper. Eg må jo eta sunt, trena og legga meg tidleg for å klare å levera, sa han, samstundes som han også gjorde det klart at han elskar jobben sin.

Misjonsmarinert

I arbeida til Ask og Goksøyr vart særleg det tabu- og skambelagte eit tema.

Lene Ask har vunne prisen for Årets teikneserie 2022 for boka O bli hos meg, som handlar om opplevingane til misjonærbarn.

– Eg er jo frå Stavanger og er om lag marinert i misjon, sa ho mellom anna samstundes som ho fortalte om barn som var skilt frå foreldra sine, som vart utsett for overgrep, og som vart svikta av sine eigne då dei vart kjend med overgrepa.

Ask baserer sine arbeid på historisk arkivmateriale og intervju. Hennar framgangsmåte resulterer i dokumentariske forteljingar frå røynda, fortalt gjennom sarte, såre og personlege blyantstrekar.

Den som tenkjer at teikneseriar helst er morosame og serverer lettbeint underhaldning kan få seg ei aha-oppleving i møte med utstillinga som heng i Guddal den neste månaden.

Lene Ask starta si visuelle karriere som fotokunstnar. Då ho fekk smaken på teikning såg ho seg ikkje attende. Her eit utsnitt frå boka hennar Kjære Rikard, som baserer seg på brevvekslinga mellom ein far og son som vert skild frå ein annan grunna misjonærlivet. Breva har Ask fått kjennskap til gjennom Misjonsarkivet i Stavanger.
Sindre W. Goksøyr og Lene Ask kommuniserer visuelt om emne som er knytt til skam og tabu i sine arbeid. Utrykka deira er derimot vidt ulike.

Takksam flokk

– Eg hadde aldri kunna arrangert dette seminaret hadde det ikkje vore for støtta eg fekk frå Fritt Ord og Fonnafjord Næringspark, sa Gøril då seminaret var ferdig.

Ho var tydeleg takksam for å kunne tilby opplevingar som dette, noko fleire av deltakarane også gav tydeleg uttrykk for at dei sette pris på.

– Eg er glad i teikning, men dette er jo jobb, sa Heidi Sande Gertz, dagleg leiar på Nordli bokhandel på Husnes, under seminaret.

Å få større kunnskap om teikneseriesjangeren var såleis noko ho sette pris på både personleg og profesjonelt.

Ingrid Guddal var også blant dei som sette pris på arrangementet.

– Dette var eit fantastisk bra seminar, det har vore utruleg flott å få eit større innblikk i teikneseriesjangeren, så tusen takk, rosa ho dei seks ekspertane, før dei kasta seg i bilane og tok til på den eksotiske returen att.

Det var eit jamt tilsig av folk då teikneserieutstillinga i Galleri G Guddal opna laurdag. Utstillinga heng til 3. oktober.
– Tusen takk for eit fantastisk flott seminar, sa Ingrid Guddal då arrangementet var ferdig. Til denne kommentaren fekk ho eksplisitt støtte frå dei andre som var til stades.
Deltakarane måtte mellom anna svara på kva dei meinte om kunstig intelligens, som no er blitt så intelligent at den kan ta over delar av den kommersielle illustrasjonsmarknaden.
Gøril Guddal var glad for at ho hadde moglegheita til å invitera publikum til teikneserieseminar. – Eg hadde aldri kunna arrangert dette seminaret hadde det ikkje vore for støtta eg fekk frå Fritt Ord og Fonnafjord Næringspark, sa ho.
teikneseriar kultur og underhaldning seimsfoss nyhende litteratur biletkunst
Powered by Labrador CMS