Desse vil byggja Røldalstunnelen
Fire entreprenørar er kvalifiserte for å delta i anbodskonkurransen om å byggja den nye Røldalstunnelen.
Publisert
Statens vegvesen har no kvalifisert fire aktørar til konkurransen om å byggja ny Røldalstunnel på E134 mellom Røldal og Seljestad. Desse er:
• AF Gruppen Norge AS
Annonse
• Hæhre Entreprenør AS
• JV Røldalstunnelen Metrostav Norge AS og Bertelsen & Garpestad AS
• JV Leonhard Nilsen & Sønner AS og Obrascòn Huarte Lain, S.A.
I utgangspunktet var det seks entreprenørar som ynska å delta i konkurransen. Men den italienske entreprenøren Itinera vart avvist etter ein dom i Oslo tingrett der Vegvesenet fekk medhald i saka. I tillegg så trekte JV Implenia Norge AS og TT Anlegg AS seg frå konkurransen.
Annonse
Spanande prosess
No har dei kvalifiserte entreprenørane tida fram til 31. januar på å levera endeleg tilbod på kontrakten. Tildeling av entreprise og kontraktinngåing er venta i mars.
– Det er utruleg kjekt at vi får ha med oss fire solide aktørar inn i anbodskonkurransen. Dei har alle god erfaring og kompetanse til å kunne utføra utbygginga, og det legg grunnlaget for ein spanande prosess fram mot tildeling av hovudentreprisen, seier prosjektleiar Frode Lykkebø til Statens vegvesen si heimeside.
Prosjektet er lyst ut som totalentreprise. Det omfattar prosjektering og bygging av eitløps-tunnel med tilknyting mellom Seljestad og Røldal. Kontrakten, som har ein verdi på 2,5 milliardar kroner ekskl. mva, omfattar følgjande:
• 1,7 km ny veg i dagen på Liamyrane ved Røldal.
• 1,2 km ny veg i dagen på Seljestad, samt gang- og sykkelveg på ca. 0,7 km.
Annonse
• Ny tunnel mellom Liamyrane og Seljestad på om lag 12,4 km.
• Diverse konstruksjonar i tilknyting til veganlegget.
Førebuande arbeid
– Det blir spanande å starta opp forhandlingane fram mot jul. Spesielt spanande blir det å sjå korleis dei ulike tilbydarane stiller seg til kravet om bruk av elektriske maskinar i drifta, utdjupar Lykkebø.
Det førebuande arbeidet er allereie godt i gang. Denne jobben er tildelt Brødrene Flatebø AS, og omfattar bygging av ny bru over elva på Seljestad. Der skal det etter kvart bli etablert nytt parkeringsanlegg sør for elva, saman med nytt drikkevassanlegg.
