Trio-utsendingane Frida Haugen (t.v.) og Ann Helen Høivik Skogseth fekk den største gåva måndag kveld. Æra med å overrekkja pengane fekk ungdomen Tilde Ølfarnes.

Desse fekk mest av Kvinnheradstiftinga

Fem lag og organisasjonar fekk 250.000 kroner eller meir under Kvinnheradstiftinga si gåveoverrekking. Toppnoteringa var på heile 900.000 kroner.

Morten Nygård
Journalist
Publisert Sist oppdatert

Måndag kveld kunne Kvinnheradstiftinga endeleg avsløra kven som stakk av med pengar under haustens utdelingsrunde. Alle mottakarane var sikkert strålande nøgde, men nokon kunne smila breiare enn andre. Det vart nemleg delt ut fem gåver på 250.000 kroner eller meir.

Aller mest fekk IL Trio. Dei tok i mot heile 900.000 kroner til modernisering og vedlikehald av Triohuset på Husnes.

Deretter kom Herøysund bygdalag, som kunne gle seg over 500.000 kroner til oppgradering av Grendahuset i bygda.

Herøysund bygdalag ved Siv Støve Syversen (t.v.) og Frøydis Nilsen Mathisen kunne smila breitt over gåva dei fekk.

Nummer tre på gåvepallen var Valedamene. Dei fekk eit diplom med summen 350.000 påskrive. Pengane skal gå til ungdomsloft.

«Hjartans takk till Kvinnheradstiftinga som gong etter gong støttar arbeidet vårt! No gler me oss til å setje i gang arbeidet med ungdomsloft på bygdahuset. Er du ungdom og vil bidra til utforming? Ta gjerne kontakt», skriv Valedamene på Facebook.

Valedamene ved Siri Rusten (t.v.) og Liven Thorkildsen Santiago fekk ei ny gåve frå Kvinnheradstiftinga.

Også fjerdeplassen hamna på Valen. Arbeidsgruppa for Valeparken sikra seg nemleg 275.000 kroner til leikeapparat.

No kjem det leikeapparat i Valeparken. Sondre Solheim (t.v.) og Geir Ove Norheim tok i mot pengane.

Til slutt tek vi med Stiftinga Halsnøy historiske senter i Høylandsbygd. Dei får 250.000 kroner inn på konto, pengar som er øyremerka utviding av museet.

Halsnøy historiske senter ved Ivar Hesjedal (t.v.) og Nicolay Eide Høgenæs tok i mot 250.000 kroner.
halsnøy fritid herøysundet nyhende valen husnes
Powered by Labrador CMS