– Desse bruene må koma

Onsdag hadde Hovudutval for samferdsel og mobilitet i Vestland fylkeskommune ei drøfting av Fjelbergsambandet før dei byrja på saklista. Politikarane gav positive signal.

Blant dei som tok ordet var Gunnar Moland (H). Han konkluderte at ferjeavløysingsmidlane er nok til å finansiera sambandet.

– Eg håpar prosjektet kjem i gang, for dette er eit håplaust ferjesamband. Eg synest desse bruene må koma, sa han.

Også Sigbjørn Framnes (Frp) var positiv til prosjektet. Men han kom samstundes med ei lita åtvaring.

– Viss vi ikkje får til Fjelbergsambandet no, så tenkjer eg det kan bli vanskeleg å få til, sa han.

Framnes antyda difor at det snarleg vil koma eit forslag om å leggja inn planmidlar til Fjelbergsambandet, dette for å synleggjera at politikarane ynskjer å realisera prosjektet.

Godkjenna bruer

John Martin Jacobsen, seksjonsleiar for forvaltning, utgreiing og geodata i avdeling for infrastruktur og veg i Vestland fylkeskommune, fortalde at det er Statens vegvesen som skal godkjenna kva type bruer ein vil byggja. Han var dessutan oppteken av kostnadane.

– Vi må sikra oss at framtidige vedlikehalds- og driftskostnader er på eit akseptabelt nivå, minna han om.

Jacobsen fekk òg siste ord i debatten.

– Vi er på eit godt sport saman med kommunen, slo han fast.