Departementet gjorde om på kraftavslag

Attende i august 2019 søkte Fatland kraft AS om konsesjon til bygging av Svoldal kraftverk. Ved å nytta fallet i Svoldalselva mellom kote 450 og kote 5, i tillegg til ei overføring frå Nedstebekken, la ein opp til årleg produksjon på 5,6 GWh.

I mars 2021 gav Norges vassdrags- og energidirektorat (NVE) avslag på søknaden. Dette grunngjeve med betydelege terrenginngrep som vil vera negative for opplevinga av landskapet. NVE meinte at desse inngrepa åleine gjer at ulempene vert større enn fordelane ved prosjektet.

Avslaget var påklaga, men NVE endra ikkje meining. Dermed vart saka i oktober 2021 sendt vidare for avgjerd hjå Olje- og energidepartementet. Like før påske kom endeleg svaret derifrå.

Landskapstilpassing

«Tiltaket ligg i eit fjordlandskap med høg verdi. Departementet meiner at inngrepa i liten grad vil påverka det større landskapsbiletet, då tiltaket vil vera lite synleg på avstand. Departementet legg til grunn at utbygginga vil medføra negative konsekvensar lokalt i Svoldalen, men at det vil vera mogleg å redusera dei negative verknadane til eit akseptabelt nivå gjennom god detaljplanlegging og landskapstilpassing av dei tekniske inngrepa (vassveg, anleggsvegar, inntak mv.), revegetering av røyrtrasé, samt slepp av tilstrekkeleg minstevassføring», skriv departementet.

Dei meiner elles at tiltaket vil ha liten negativ påverknad på biologisk mangfald og friluftsliv i området. Etter ei samla vurdering tek departementet difor klagen til følgje, og gjev konsesjon til bygging av Svoldal kraftverk. Vedtaket kan ikkje påklagast.