Departementet ber om endra vernegrense i Hattebergdalen
Klima og miljødepartementet har bede Miljødirektoratet greia ut forslag til endring av forskrift om vern av Hattebergsdalen landskapsvernområde.
Publisert
Sist oppdatert
– Klima- og miljødepartementet (KMD) ber Miljødirektoratet (MD) setja i verk utredning og deretter høyring av forslag til endring av forskrift om vern av Hattebergsdalen landskapsvernområde, slik at forskrifta heimlar nydyrking i avgrensa omfang, heiter det i brev frå departement til direktorat, som nasjonalparkstyret fekk i hende tysdag.
– Det er tydeleg at departementet ser behovet for aktiv beitebruk for å ivareta verneinteressene i Hattebergsdalen, og dei instruerer no Miljødirektoratet til å setja i gang prosessen med å endra forskrifta, vurderer Sigrid Handegard, leiar i Folgefonna nasjonalparkstyre.
Annonse
Tempo
– Departementet er tydelege på at dette må gå fort, med fristar som viser at dei syns dette er viktig. Dei støttar nasjonalparkstyret sitt syn i saka. Dette er ei sak som har gått lenge.
No opplever eg at KMD tar eit ansvar her, og ser behovet for aktiv beitebruk i verneområdet, seier Handegard til Grenda.
KMD ber om at forslaget blir sendt på to månaders høyring så raskt som mogeleg, og seinast innan 1. juni, og at direktoratet sender departementet sin tilråding etter høyring seinast innan 1. oktober 2023.
Annonse
– Forslaget skal ut på høyring, og det skal følgja ein prosess, men eg opplever at KMD har lytta til det lokale styret, og at dei er tydelege på bruk og vern går i saman. Me er veldig glade for at dei er tydelege på framdrift, og set tydelege fristar, seier Handegard.
Aktiv beitebruk
I brevet til Miljødirektoratet skriv Klima- og miljødepartementet at dei ser behovet for aktiv beitebruk i Hattebergsdalen.
– Departementet meiner derfor at det bør utgreiast ei forskriftsendring der det vert opna for nydyrking for å legge til rette for beitebruk i verneområdet. I denne prosessen skal også mogelege negative effektar på verneverdiane av nydyrking belysast og inngå i vurderinga, skriv KMD.
– Det aller kjekkaste er signalet til dei lokale bøndene. Matproduksjonen er viktig, men dei er også veldig viktige for å ivareta kulturlandskapet, som er ein avgjerande grunn til at dette området er verna. Ein må sjå ting i samanheng, og det gjer ein her. Me er veldig glad på Endre Mehl og Målfrid Hatteberg Nerhus sine vegne, sluttar Handegard.
