Denne veka er cruisesesongen i gong
I morgon, tysdag 22. februar, innleiar det tyske AIDAsol cruisesesongen i Hardangerfjorden. Det er Eidfjord som står for første visitt.
Publisert
Skipet, som veg 71.304 tonn, vart bygd i 2011 på Meyer Werft i Tyskland. Det er plass til 2.644 passasjerar om bord, i tillegg til eit mannskap som tel 609 stykk.
Siden dåpen i 2011 har AIDAsol vore 77 gongar i Eidfjord og 13 gongar i Ulvik. I år skal skipet vitja Eidfjord ytterlegare tre gonger, og kjem til Rosendal fire gongar i løpet av 2022, melder Helge Møller i Cruise Destination Hardangerfjord.
Annonse
– Cruiseskipa seglar for tida med redusert passasjerkapasitet. Sjølv om alle passasjerar og mannskap må vere fullvaksinert er det sett av eit visst tal lugarar i tilfelle av karantene-isolasjon. Strenge reglar før og under segling er sett i verk, men det er letta på restriksjonane ved ilandstiging undervegs, informerer dei.
Går alt etter planen er det venta 89 anløp i Eidfjord, 36 i Rosendal og 7 anløp i Ulvik i løpet av 2022. Siste anløp i Eidfjord er 29. oktober og i Rosendal 21. desember.
