Denne møtelomma skal vonleg utvidast

Når ein svingar av hovudvegen i Dimmelsvik og inn på Landavegen, så er det meste av strekninga oppover ganske smal. Jamlege møtelommer er såleis avgjerande for at trafikken skal kunna flyta nokolunde greitt. Ei av desse møtelommene ligg berre om lag hundre meter frå krysset, på Seberg – eller Setberg som det heiter i einskilde kart. Men denne lomma er i smalaste laget. Det blir det no vonleg ei ordning på.

«Vi ynskjer å utvida den eksisterande vetle lomma som er der i dag, sånn at landbruksmaskiner og tungtransport har moglegheit for å møtast på strekninga».

Det skriv kontrollingeniør Adrian Kråkevik i Vestland fylkeskommune i ein e-post til Kvinnherad kommune. Ifølgje ei teikning skal lomma no bli 35 meter i alt; av dette vil ei strekning på 25 meter få ei breidde på 3,5 meter.

«Er dette eit tiltak som er søknadspliktig?», spør Kråkevik, som legg til at grunneigar er positiv til tiltaket.

Rygga

Når Grenda snakkar med Kråkevik onsdag ettermiddag, fortel han at svaret frå kommunen er kome same dag. Konklusjonen er at det er eit søknadspliktig tiltak.

– Eg trur jo kommunen er velviljug, men det er opp til dei å avgjera. Eg veit ikkje kor lang tid slik handsaming tek, i verste fall får vi ikkje gjort arbeidet før til neste år, opplyser Adrian Kråkevik.

Han er elles kjent med at store køyretøy stadig vekk må rygga nesten heilt ned til hovudvegen for å laga passasje på strekninga.