Den nye ordføraren: - Ein fin koalisjon til å leia an

– Me har funne ei semje og blitt einige om å danna eit fleirtal. Me skal jobba vidare dei neste dagane med dei tinga me er einige om, både politikk og posisjonar. Me har nokre forståingar om ting me skal bruka tid på å jobba inn. Når dette var klart, meinte me alle at det var behov for å koma ut med at me har funne saman om posisjonane, seier Vegard Bjørnevik til Grenda.

Han peikar på at det då var naturleg at Høgre som største partiet tar ordføraren, medan Ap, som nest størst med sine seks mandat, tar varaordføraren. KrF og Venstre har høvesvis to og eitt mandat i det komande kommunestyret.

– Me kjem til å setja ut nokre strategiar framover, men reknar med at me får mykje gjort i løpet av neste veke. Eg har hatt trua på dette heile vegen, og gler meg til fortsetjinga. Eg trur me har funne ein fin koalisjon til å leia an, og kjem til å jobba med breie fleirtal i alle saker. Saman er me sterke, seier Bjørnevik om den nye posisjonskoalisjonen.