– Den kjemiske tilstanden til fjorden er allereie vurdert til dårleg
Equinor har fått løyve til planlagde utslepp i Klosterfjorden i samband med testing av eit nytt skip. Dette får kommunestyrerepresentant Per Harald H. L. Johansen til å reagera.
I ein interpellasjon til kommunestyret fortel han om sårbare økosystem, ein fjord som allereie har dårleg kjemisk tilstand og ber om snarlege tiltak frå deira side.
«For få dagar sidan vart det kjent at Equinor har fått løyve frå Miljødirektoratet til å sleppe ut tonnevis med kjemikaliar og ureinsa avløpsvatten og kloakk frå skipet Johan Castberg i Klosterfjorden. Klosterfjorden og Halsnøyfjorden ligg på innsida av terskelen for Hardangerfjorden og er i dag vurdert til å ha den kjemiske tilstanden «Dårleg».»
Annonse
Havets regnskogar
Vidare trekk han fram korallreva i fjorden, som ikkje berre er viktige økosystem og komplekse biologiske strukturar, men som også er skjøre og lette å øydeleggja.
– Dette er strukturar som kan vera opp til 10 000 år gamle, og dei vert ofte omtala som havets regnskogar. Samstundes er dei skjøre og sårbare for miljøgifter og annan ytre påverknad, uttala Johansen.
AP-politikaren ber kommunestyret om å vurdera to tiltak:
Annonse
1. «Kvinnherad kommune sender snarast inn klage på Miljødirektoratets avgjersle om løyve til utslepp frå Equinor v/Johan Castberg i Klosterfjorden etter ordlyd i pkt. 2.»
2. «Kvinnherad kommune krev at Miljødirektoratet snarast inndreg løyvet som er gjeve etter forureiningslova for utslepp til sjø i Klosterfjorden frå Equinors skip Johan Castberg.
Kvinnherad kommune aksepterer ikkje at det vert gjort utslepp av skadelege kjemikaliar eller ureinska kloakk i Klosterfjorden. Den kjemiske tilstanden til fjorden er allereie vurdert til dårleg. Ytterlegare utslepp vil vera ein risiko for sårbare økosystem og korallrev, og vil føra til ei forverring av fjordens tilstand. Særskilt må det òg påpeikast at det er svært problematisk at fortynningseffekten av kjemikaliane i fjorden er begrensa kontra i open sjø, samt nærleiken til det føreslegne vernet av «Ytre Hardanger Marine Verneområde».
Kvinnherad kommune er vidare sterkt kritisk til Miljødirektoratets vurdering om at miljøulempene som følgje av dei planlagde utsleppa i Klosterfjorden ikkje er tilstrekkelege til at Equinor må løyse testing av Johan Castberg-skipet på annan måte. Den førespegla måten å løyse testinga på med ukritisk utslepp rett i fjorden er ikkje foreinleg med Kvinnherad kommune sin visjon om ein rein og sunn Hardangerfjord der ein ser på heilskapen av menneskeleg påverknad av fjordsystemet.»
