Den avtroppande næringslosen: – Det kom litt brått på
Næringslosen hjå Kvinnherad Næringsservice Frode Hetlevik har takka ja til ein ny jobb og kjem frå og med mars neste år av til å byta både jobb og kommune.
– Det var ikkje akkurat planlagt å hamna i denne situasjonen som me er i no, men når jobbtilbodet kjem så vurderer ein det jo, fortalde avtroppande næringslos Frode Hetlevik.
Etter ein prosess med eit bemanningsbyrå som ynskte å få Hetlevik inn til seg som ny leiar for Askøy Næringsråd, fekk han førre måndag den gledelege beskjeden før han så vart introdusert som leiar påfylgjande laurdag.
Annonse
Skal bli godt
– Det var jo sjølvsagt spanande, og samtidig kom det litt brått på. Prosessen har vore kjapp når det fyrst skjedde. No skal eg vera her eg er ut februar, men før den tid handlar det om å ta fatt på dei tinga som hastar mest. Hovudsakleg gjeld det den grøne næringsparken, sa Hetlevik.
– No jobbar me mot å få på plass ein masterplan og å kunne rapportera til Vestland fylkeskommune før utgangen av februar. Det er viktig å få på plass, men utover det må me også sørga for at medlemane får sin informasjon, la han til.
Næringslosen innrømmer også at det blir noko vemodig å flytta frå Kvinnherad.
Annonse
– Eg har jo trivst utruleg godt her, både i jobben og i Kvinnherad. Men samtidig så har eg også barnebarn i Bergensområdet, så det skal bli godt å koma nærare dei, forklarte Hetlevik.
Hetlevik kunne også informera om at styret i Kvinnherad Næringsservice allereie er i gang med å finna ein etterfylgjar, noko også styreleiar Stig Bruntveit kunne bekrefte.
– Ja, KNS har starta rekrutteringsprosessen for å finna ein erstattar til Frode, erkjente styreleiaren.
