Deltok i klassequizen

Dei som måtte i elden var Emma Louise Høysæter Kolltveit, Mathilda Valvatna Kristiansen og Isak Søllesvik.

– I klassen vår var det først ingen som hadde lyst, men då meldte me oss. Me måtte jo visa læraren at me ikkje var så late, smiler Mathilda, som går i 10B. Emma Louise går i same klasse, medan Isak går i parallellklassen.

Klassequizen-laget skulle bestå av elevar frå begge klassane, og likeins skulle både gutar og jenter vera representert. Alle tre var samde om at det var vanskeleg, men dei er desto meir nøgd med resultatet.

– Me fekk sju av tolv rette, og det var eigentleg over all forventning, seier Emma Louise.

Dei hadde vore nøgde med å svara korrekt på halvparten av spørsmåla, som handla om alt frå Disney, til bilmodellar til aviser.

– Det var ikkje akkurat noko me kunne lese oss opp til på forhand, så me måtte berre ha hovudet med oss, legg Emma Louise til.

– Ein må kunne mykje for å vera god der, så all ære til dei klassane som har fått nesten alt rett, held Isak fram.

Det er fire klassar som kjem til finalen, som føregår i Oslo. Då Grenda prata med elevane frå Rosendal ungdomsskule var det så langt tre skular som hadde klart elve av tolv rette, og for å kome til finalen må ein altså konkurrere heilt i toppen.

– Me kom iallfall ikkje nedst, smiler Emma Louise nøgd.

Neste onsdag skal opptaket frå klassequizen sendast på radio. Då skal heile skulen samlast for å lytta.

– Men lærte de noko då?

– Me lærte jo noko då me svara feil, for det var to svaralternativ. Men me deltok mest for moro skuld, svarar Emma Louise.