Delte ut to millionar kroner på eit kvarter: – Eg er heilt mållaus, og det er det sjeldan eg blir

Den siste veka har Sparebank 1-stiftinga Kvinnherad gleda mange frivillige eldsjeler i Kvinnherad. Fredag delte dei ut 2,5 millionar kroner til Kvinnherad Arena, og måndag gav dei ut koronamidlar til 19 av kommunen sine frivillige lag.

Men stiftingsstyret har ikkje teke av seg spanderbuksene heilt endå. Onsdag ettermiddag inviterte dei fem lag og organisasjonar frå Rosendal til ei mini-utdeling i Rosendal samfunnshus.

Stiftinga har reservert 20 millionar til storstova

– Det er synd at vi ikkje får samla alle gåvemottakarane under same tak. Dette er tredje tildelingsrunden utan ei felles samling. Det er dumt, både for dei som mottek gåvene og oss i stiftinga, sa styreleiar Svein Arne Eidsvik i Sparebank 1-stiftinga Kvinnherad.

Nytt kjøken

Stiftinga har denne runden tildelt 10,3 millionar kroner til ulike lag og organisasjonar i distriktet. Men det var berre ni av prosjekta som vart offentleggjort på denne miniutdelinga i Rosendal. Resten av utdelingane vil dei offentleggjera etter fredagens utdeling på Husnes.

– Vi har eit veldig stort prosjekt her i huset vi er i. Kvar gong vi kjem hit, så ser vi at det er kome noko nytt. Vi synest det er veldig kjekt å sjå at huset får den oppgraderinga det fortener, sa Eidsvik.

Deler ut 800.000 kroner i aktivitetsmidlar - sjå kven som får pengar her

Vidare delte Jan Magnus Aasen ut gåve på éin million kroner til Trygve Torjusen i Rosendal samfunnshus, og deira prosjekt med å få på plass nytt kjøken.

– Kjøkenet her er frå 1982, og det ber det preg av. Vi har lenge ynskt oss eit kjøken som er opp til den standarden som trengs for å laga skikkeleg mat her. Med denne fantastiske gåva så satsar vi på at vi kan ha eit skikkeleg kjøken på plass når restriksjonane forhåpentlegvis er vekke til hausten. Dette er veldig flott for oss, og det vert eit nyttig løft som forhåpentlegvis kan gleda mange. Tusen, tusen takk, sa Torjusen.

Kunstgras

På utdelinga i Rosendal var Rosendal Turnlag ein gjengangar opp på scena. Dei fekk gåve til fem ulike prosjekt. Blant anna 350.000 kroner til Rosendal stadion.

– Eg er heilt mållaus, og det er det sjeldan eg blir. Denne gåva skal gå til oppgradering og vedlikehald av kunstgrasbanen i Rosendal, og til etablering av ny tribune. Vi er utruleg takksame for støtta frå Sparebank 1-stiftinga Kvinnherad. Vi hadde aldri fått til å gjera alt det vi gjer utan støtta frå dykk. Dette betyr utruleg mykje. Tusen takk, sa leiar Jostein Hatteberg i Rosendal Turnlag.

Sjå heile lista over tildelinga i tabellen under.