Delte ut gåver for 1,7 mill. kroner

Banksjef i Kvinnherad, Vivi Tranøy Loftheim, opna samlinga.

– Kjekt at så mange hadde tid til å koma og prioritera dette i ei travel førjulstid, smilte ho til dei nærare 30 frammøtte.

Sparebanken Vest hadde motteke over 40 søknader i årets søknadsrunde. I alt delte dei ut gåver til 22 mottakarar, og totalsummen var på 1.660.000 kroner. Pengane gjekk til både nye prosjekt og vedlikehaldsprosjekt.

– Heilt utruleg kor mykje spennande som finst i heile Kvinnherad. Og ikkje minst kor mange bra folk som brukar av si tid for å gjera noko for andre, slo Loftheim fast.

Sparebanken Vest har ei lang historie i Kvinnherad, heilt frå 1841 med Eid sokn sparebank. Neste år skal banken slå seg saman med Sparebanken Sør og skifta namn til Sparebanken Norge.

– Då går vi frå å vera ein mellomstor regional sparebank til å bli ein av Norges største, opplyste Vivi Tranøy Loftheim.

Offisiell opning

Gåveutdelinga starta med å gje pengar til banken sitt prosjekt «Jenter vil mer». Det handlar om å støtte jentefotballen rundt omkring. 11 jentelag frå Halsnøy, Rosendal og Trio får no i alt 220.000 kroner.

Seansen gjekk av stabelen i Bergslagen på Sunde. Det vart også løyvd pengar til huseigaren Sunde kyst- og litteratursenter. Dei skal arrangera storstila offisiell opning frå 13. til 15. juni 2025, og fekk 40.000 kroner til dette tiltaket.

Fyrste artist

Trio (sjå eiga sak) og Festidalen fekk mest, med 200.000 kroner kvar. Sistnemnde røpa av dei torsdag kveld offentleggjer den fyrste artisten til neste års utgåve.

– For Festivalane har alt blitt mykje dyrare dei siste åra. Desse pengane vil utgjera ein forskjell når vi skal planleggja. Vi ynskjer dessutan å resirkulera pengane ved å betala lag og organisasjonar for ulike typar arbeid. I år hjelpte til dømes IL Trio og Valedamene oss med vakthald og rydding etterpå, sa Jostein Sydnes til Grenda.

– Vi håpar at midlane bidreg til at engasjementet dykkar står i nokre år til, sa Loftheim då alle sjekkane hadde fått nye eigarar.