Delte ut familiepris på familiedagen
Elin og Magne Enæs fekk fortent pris, medan store og små koste seg med ulike aktivitetar då Omvikdalen Idrettslag inviterte til familiedag.
Publisert
Sist oppdatert
– Tanken er å ha eit arrangement som er ope og gratis for alle, både bygda og medlemmene til idrettslaget. Det skaper samhald, er sosialt og gøy på éin gong, seier Lene Vangberg Monsen i Omvikdalen Idrettslag (OIL) under familiedagen til idrettslaget på søndag.
Ho gleda seg over god aktivitet inne i gymsalen, der dei minste tok seg ut med leik og moro. Ute prøvde vaksne i ulike aldrar seg på idrettsmerkekrava i forskjellige greiner, medan barna hadde eit lite sykkelløp. Dei fekk også bryna seg på ulike øvingar av sorten ein ser på «Mesternes mester». Inne i ungdomshuset vart det servert betasuppe så langt lageret rakk.
Annonse
– Det er kjekt å ha eit arrangement på hausten, der ein får samla litt trådar etter skulestart. Å femna om breiddeidretten, alle aldrane og vera ein inngangsportal til idretten framover for dei. Det er fint å kunna nytta skulen her som ein base for ein slik dag, slik me nyttar det for nokon av våre aktivitetar. Det er noko med å bruka dei ressursane har i bygda, inkludert skulen og utearealet, vurderer Vangberg Monsen.
Ho meiner det er ei slag læring i det å bli vant med å gå på trening, og at ein som idrettslag er med på å oppdra barn og ungdom.
– Det er også litt tildekt folkehelsearbeid i dette, med sunn mat og aktivitet. Det er viktig å få folk i gang igjen etter pandemien, meiner arrangøren.
Idrettslaget delte også ut ein familiepris under familiedagen. Elin og Magne Enæs fekk heidersteiknet Blomsterdalen for lang teneste som arrangørar for idrettsmerketakinga i Omvikdalen IL.
