Delt om semilukka anlegg: – Vårt ansvar å setja foten ned

Mowi Seawater Norway AS har søkt om endring av oppdrettslokaliteten Slåttenes ved Ytre Matre. Selskapet har produsert postsmolt der sidan desember 2022. No ynskjer dei å utvida produksjonen med inntil tre nye semilukka merdar, noko som òg gjev stor auke i biomassen.

«Omsøkt MTB ved Slåttenes er på 3900 tonn. Talet på fisk som blir sett ut pr. syklus blir totalt cirka 2,4 millionar smolt, som skal fôrast opp til omlag 1,2 kg, før den vert flytta vidare til andre lokalitetar der den står fram til slaktevekt. Estimert produksjon ved Slåttenes blir dermed på rundt 2520 tonn per syklus. Anlegget sin teknologi med semilukka merdar med slamoppsamling vil bety mindre utslepp til det omkringliggande miljø, i høve til konvensjonelle opne merdar», stod det i sakspapira til formannskapsmøtet førre veke.

Avtrykket må ned

Per Harald Havnen Löfgren Johansen (Ap) er bekymra for endå meir utslepp i fjorden.

– Det totale avtrykket vil auka, trass i at det skal vera eit semilukka anlegg. Eg meiner at om ein skal auka produksjonen, så må avtrykket samtidig gå ned, sa han.

Silje Nordtveit Olsen (SV) var på same side som Johansen og Naturvernforbundet Kvinnherad, som hadde sendt inn ein uttale der dei går sterkt imot planane.

– Eg høyrde under Rosendalsveko at det er stor negativ påverknad på fjordane våre. Fjorden kokar, lærte eg. No byrjar vi å gå langt utover tolegrensa for oppdrettsanlegg i området vårt, understreka ho.

Ove Lemicka (Frp) tenkte derimot heilt motsett.

– Dette er ei vekstnæring som har veldig god lønsemd, skapar arbeidsplassar og ringverknader. Vi i Kvinnherad har sagt at vi ynskjer å utvikla denne næringa vidare. Det er ei veldig god utvikling at dei som søkjer vil laga semilukka anlegg. Vi må ikkje laga ein næringsfiendtleg politikk på dette, meinte han, og fekk full støtte frå Knut Johannes Helvik (H).

– Det vil vera eit uheldig signal å senda til næringa at vi skal vera imot eit semilukka anlegg. Utviklinga vil gå vidare mot lukka anlegg, vurderte han.

Setja foten ned

At det skjer ei utvikling i teknologien, er også Per Harald Havnen Löfgren Johansen glad for. Men han viste til at Eide fjordbruk sitt nye anlegg ved Varaldsøy skal samla opp 90% av slammet, noko som er mykje meir enn det Mowi legg opp til.

– Det er positivt at det skjer ei utvikling, men samtidig er det vårt ansvar som lokalpolitikarar å setja foten ned. Vi må tora å stilla krav til næringa, kommenterte han.

Med seks mot tre (Johansen, Olsen og Vaage) gjekk formannskapet inn for at det vert gitt løyve til Mowi. Eit vilkår er at det ved endring av lokaliteten, så må det takast omsyn til andre interesser i området.