Delt om Hordfast – ventar på møte

Fleire i formannskapet uttrykte større eller mindre skepsis til at Kvinnherad kommune skal bli medeigar i Hordfast AS. Eit informasjonsmøte tidleg i desember blir avgjerande.

Kvinnherad kommune har fått tilbod om å kjøpa fem aksjar i pådrivarselskapet Hordfast AS, til ein totalkostnad av 100.000 kroner. Til formannskapet måndag ettermiddag la kommunedirektøren fram ei positiv innstilling, men med nokre atterhald, mellom anna om korleis drifta skal finansierast, og kva forventningar som vert stilt til eigarane i den samanheng.

Hordfast AS skal halda eit informasjonsmøte 3. desember, og der vil truleg ordførar Vegard Bjørnevik (H) delta. Han skal deretter orientera formannskapet to dagar seinare, og fyrst då vil eigarskap og aksjekjøp bli endeleg avgjort.

Storpolitikken

– Dette er ei sak eg ikkje er utelukkande positiv til. No er ein komen dit at det ligg føre ein ferdig utgreidd trasé, og då er det storpolitikken som avgjer til sjuande og sist. Prosjektet ligg ikkje inne i NTP (Nasjonal transportplan), sjølv om ein aldri skal forskottera kor vidt det kan koma inn igjen. Når vi er i ein situasjon der vi skal snu på kronene, er eg usikker på om vi skal bruka 100.000 kroner på dette, sa Per Harald Havnen Löfgren Johansen (Ap).

Men han enda likevel med å røysta for at ordføraren dreg på møtet og får meir kunnskap. For var derimot ikkje Silje Nordtveit Olsen (SV).

– Vi ynskjer overhovudet ikkje å prioritera dette, for Hordfast er eit prosjekt med store naturinngrep. Dette er eit selskap vi absolutt ikkje bør gå inn i, slo ho fast.

Ordførar Vegard Bjørvik fann derimot gode grunnar til å stilla seg positiv.

– Eg synest Hordfast er det viktigaste samferdsleprosjektet på heile Vestlandet, og det er veldig trist at det ikkje kom med i NTP, sa han.

Bjørnevik trur likevel prosjektet vil bli realisert, og sidan Kvinnherad er ein kommune som jobbar aktivt for å kopla seg inn på E39, meiner han det er viktig å vera til stades der avgjerslene skjer.

– Men vi skal ikkje gå inn ukritisk, understreka han.

Motstandar av bru

Jostein Rødland (INP) tykkjer det er bra at selskapet no ser på heile strekninga mellom Stavanger og Bergen, ikkje berre mellom Stord og Os.

– Men eg er eigentleg brumotstandar, for ei bru vil forskyva prosjektet i lang tid på grunn av at kostnadane berre eskalerer. Eg er litt skeptisk, men vil høyra kva de får ut av møtet, funderte han.

Innstillinga vart vedteke med seks mot to (Silje Nordtveit Olsen og Svein Åge Vangdal) røyster.