– Dei treng alt

Måndag 23. oktober kjem traileren til THK-stiftelsen innom Kvinnherad for siste gong i år. I forkant vert lageret i Uskedalen ope to laurdagar; den fyrste var no i helga. Mange nytta høvet til å levera nokre sekker med ymse utstyr, mest klede.

Blant dei som tok turen var Rita Kaldestad. Ho dukkar nok opp komande laurdag også.

– Skal eg koma med strikketøy og strikkegarn? Og så har eg mange koffertar og bagar som eg har tenkt å hiva. Du sa til meg ein gong tidlegare, «dei treng alt», spurde ho den lokale eldsjela Tormod Myklebust.

– Kom med det, så lenge det er heilt, takka sistnemnde.

Stolar

Stiftinga har også mykje anna som skal om bord i traileren. Mellom anna skal dei henta 100 forsamlingsstolar frå Helgatun i Myrkdalen og 70-80 stolar frå Framnes i Kvam.

– Dimmelsvik entreprenør ved Atle Søllesvik stiller bil gratis til disposisjon for å henta stolane. I tillegg skal vi få nokre utrangerte rullestolar og rullatorar frå Hjelpemiddelsentralen, opplyste Myklebust.

Han fortalde vidare at to tilsette frå Rosendal sport var utom med eit lass fotballar og drakter. I tillegg har stiftinga motteke ei eske med 100 hovudlykter.

– Men vi tenkte det var for gale å senda lyktene nedover utan batteri, så då ringte vi til S. Rødsten bilforretning, og no får vi 300 batteri frå dei, smilte Tormod.

– Det er kjekt med slike oppmuntringar, la han til og takka alle gjevarane.

Den faste staben

Til å hjelpa seg på laurdag hadde Tormod Myklebust det han karakteriserte som den faste staben; det vil seia Thor Arne Eik Nygård, Leif Jarle Bergstø og Renaldas Bute.

Som nemnt er mottaket også ope komande laurdag. Det må elles presiserast at traileren ikkje kjem til å køyra rundt til andre bygder, slik den har gjort ved nokre høve tidlegare. Men det er råd å levera i Uskedalen fram til den 23. etter avtale med stiftinga.

Når bilen køyrer til Ukraina er det utan lokale sjåførar ved dette høvet.