Datainnbrot hjå Lingalaks: – Vondsinna aktørar

Lingalaks AS driv matfiskproduksjon i sjø, og har sine anlegg i kommunane Kvinnherad (Nebbo ved Husnes), Kvam og Radøy. Selskapet er også ein av eigarane i Ænes inkubator. Hovudkontoret deira ligg i Norheimsund. Torsdag ettermiddag sendte Lingalaks ut pressemelding om at dei er råka av eit datainnbrot som har påverka deira system. Innbrotet vart identifisert den 18. desember klokka 13:20, og hadde då pågått i 3 timar.

«Ei førebels undersøking viser at vondsinna aktørar har skaffa seg tilgang til nokre av våre interne system klokka 10:02 den 18. desember 2024. og har starta innsamling av eldre data. Angrepet vart oppdaga og stoppa. Nokre sensitive data har blitt lekka ut før angrepet vart stoppa. Dette er personopplysningar som personnummer, namn, e-postadresser og telefonnummer til tidlegare og noverande tilsette fram til 2021. Lekkasjen gjeld også kontaktinformasjon til kundar og leverandørar fram til 2021. Vi jobbar tett med sikkerheitsekspertar for å forstå omfanget av hendinga og avgrensa vidare risiko. Våre system er intakt og fungerer som normalt», står det.

Meldast til politiet

Lingalaks opplyser om fleire tiltak som umiddelbart etter oppdaginga vart sett i verk: Sikra systema for å forhindra ytterlegare tilgang, engasjert eksterne ekspertar på datasikkerheit for å gjennomføra ein grundig gjennomgang, varsla Datatilsynet i samsvar med regelverket, og innført tiltak for å varsla personar som kan vera råka av hendinga.

Datainnbrotet vil meldt til politiet.

«Vi tek dette svært alvorleg, og jobbar kontinuerleg for å styrka våre sikkerheitssystem. Vi beklagar denne hendinga og eventuelle ulemper dette har medført. Våre kundar og samarbeidspartnarar kan vera trygge på at vi gjer alt som står i vår makt for å handtera situasjonen og førebyggja at liknande hendingar skjer i framtida», skriv Lingalaks.