Dårleg vegstandard: Desse bilskadane fekk mange i sommar

Ifølgje Frende forsikring har mange som reiste på bilferie i sommar fått eit ublidt møte med norske vegar.

Det seier fagsjef på motor i Frende Forsikring, Roger Ytre-Hauge, i ei pressemelding.

– Vi har sett mange skader på hjul og felgar i sommar. Punkterte dekk, skadde felgar, øydelagde støytdemparar og skeiv hjulstilling. Det skjer fordi mange har køyrd på dårlege vegar. Hol i vegane, telehiv i bakken og smale vegar har sett sine spor på mange bilar, seier han.

Heile 40 prosent har opplevd å få skade på bilen på grunn av dårleg veg, dette ifølgje ei undersøking utført av NAF i 2022. Og Frende ser ein auke i denne typen skader kvar einaste sommar.

– Det vert brukt enorme summar på vedlikehald av vegar i Norge kvart år, men vi ser at standarden likevel er for dårleg mange stader. Det er eit stort etterslep med vegar som burde vore i betre stand, hevdar Ytre-Hauge.

Dødsulukker

Før sommaren kom Riksrevisjonen med kritikk mot vegstandarden rundt i landet. Faktorar relatert til drift og vedlikehald medverkar til omtrent 30 dødsulukker på norske veger årleg. I fjor omkom 118 menneske i trafikken, viser tal frå Statens Vegvesen. Det var ein stor auke frå året før, då talet omkomne var 80.

– Dårlege vegar burde ikkje vore ein faktor som fører til dødsulukker. Det er altfor mykje anna som bidreg til det som var ein skrekkeleg dødsstatistikk i fjor. Sjåførar som sjekkar mobilen bak rattet, køyrer for fort, eller blir forstyrra på andre måtar er farleg nok om ikkje vegen i seg sjølv også skal vera ein faktor, seier fagsjefen.

Også campingvogner kan få store skader.

– Vi ser også at mange med campingvogner får skader kvar sommar, etter køyring på dårlege vegar. Dette er skader som ikkje skjer akutt, så mange oppdagar det fyrst etter ferien, eller ved årleg service eller fuktkontroll, der det blir oppdaga lekkasjar eller fuktskadar. Vi ser at veggar, golv og tak rett og slett losnar frå kvarandre fordi vogna ikkje toler påkjenninga av ein heilt vanleg norsk sommarferie, fortel Roger Ytre-Hauge.

Erstatning

Frende, som har hovudkontor i Bergen og over 300 tilsette, opplyser at folk kan krevja erstatning frå det offentlege viss det oppstår ein skade som vegstyresmaktene burde ha ansvaret for. NAF tilrår i slike tilfelle at du sender inn eit skriftleg krav til vegeigar der skaden skjedde. Det kan vera kommune, fylkeskommune eller staten som er ansvarleg for vegen.