Dansk-norsk samarbeid skal gjera kystfarten grøn

Liquiline vil saman med danske Greenhydrogen jobba for ei grøn og dieselfri framtid til sjøs.

Det er brei semje både hos politikarar og personar i næringslivet om at det ikkje finst nokon veg utanom hydrogen om all sjøtransport og tungtrafikk langs vegane skal bli utsleppsfrie. No ynskjer Knut Førland og Liquiline å starta prosessen.

Med desentralisert produksjon av hydrogen, rett på kaien der drivstoffet trengs, vil det dansk-norske samarbeidet mellom norske Liquiline LNG og danske Greenhydrogen bidra til ei grøn og dieselfri framtid til sjøs.

I ein større sak i Bergens Tidende fortel dagleg leiar i Liquiline, Knut Førland, og direktør i Greenhydrogen, Niels-Arne Baden, om satsinga si i Norge.

– Vi har lang erfaring med LNG (naturgass), og har blant anna levert bunkringsanlegget til danskebåten i Hirtshals, men det er hydrogen som er framtida, seier Førland til BT.

– Den norske maritime marknaden er ein kjempemarknad. Vi ser den som veldig spennande. Liquiline er ei verksemd som kjenner den maritime bransjen, og vi har store forventningar til samarbeidet, seeir Baden til avisa.

Dei to bedriftene møttest på hydrogensymposium i Tyssedal. Torsdag i førre veke formaliserte dei ein avtale på den danske ambassaden i Oslo.

– Liquiline har dei siste par åra hatt blikket mot Hydrogen, men vi har vore klare over at vi har mangla elektrolyse-teknologien. Den får vi med dette samarbeidet, seier Førland.

I tida framover skal blant anna bedriftene prøva å jobba fram ei løysing som gjer at dei kan framstilla lokalprodusert, flytande hydrogen i små volum. Ei løysing Baden fortel til avisa at dei håpar å ha på plass i løpet av eit par år.