«Dagsnytt» feirar 90 år

Den fyrste «Dagsnytt»-bulletengen vart lese av Toralv Øksnevad, som vert rekna som grunnleggjaren av den moderne nyheitstenesta i NRK.

«Mykje har skjedd sidan då. Nyheitstilbodet til NRK har utvikla seg i takt med nye medievanar og er i dag fleirmedialt. Publikum kan få med seg nyheiter frå NRK på både TV, radio og internett. «Dagsnytt» er framleis ein viktig del av dette tilbodet», skriv kommunikasjonsansvarleg i NRK Vetle Nielsen i ei pressemelding.

Viste veg for utvikling

Alt på 30-talet var det ein diskusjon om kva konsekvensar vidareutviklinga av ein såkalla «kringkastingsjournalistikk» ville få for avisjournalistikken.

«Den gong som no var svaret at avisene måtte satsa meir på lokalt stoff, meir på bakgrunnsstoff og meir spesialstoff. «Dagsnytt» er framleis ein berebjelke i NRK sitt tilbod, så dette er ein stor dag», seier kringkastingssjef i NRK Vibeke Fürst Haugen.

Enorme lyttartal

Alle dagar i året leverer «Dagnytt» siste nytt kvar heile time gjennom heile døgnet. På kvardagane har programmet over 1,3 millionar lyttarar.

«Det ti minuttar lange programmet klokka 07.30 er det som har flest lyttarar. Om lag ein halv million får med seg denne sendinga på radio og TV. Midt på natta, klokka 03.00 har programmet nesten 50.000 lyttarar. Det er det same som to gonger kapasiteten til Ullevaal Stadion», skriv Nielsen.

«Dagsnytt» er ein vital nittiåring som appellerer breitt til det norske folk. Det er viktigare enn nokon gong med redaktørstyrte nyheitsflaggskip som folk kan stola på. Mellom dei er «Dagsnytt eit ankerfeste som døgnet rundt held det norske folk oppdatert med påliteleg rapportering av det viktigaste som skjer heime og ute», seier nyheitsredaktør i NRK Knut Magnus Berge i pressemeldinga.