Då Trio tok i mot Brann

For dei med lokalfotballabstinens repeterer me med stor glede den største av einskildkampane i Kvinnherad i dette milleniet: Trio - Brann i NM-oppgjer i Husnes Idrettspark 20. mai 2007!

Dette rapporterte Grenda frå oppgjeret tysdag 22. mai:

Trio imponerte i cupkampen mot Brann, trass 0-5.

– Jobbar dei like hardt som dette i kvar kamp, rykker Trio opp, var attesten frå Brann-trenaren.

Trio jobba knallhardt i 90 minutt, men når alt kom til alt manglar dei fem treningar i veka for å halda tritt med tippeligaspelarane dei brynte seg på. Kampen var ikkje meir enn tre sekund gamal før Johnny Furdal meldte seg på i kampen om rampelyset. Han stal ballen like etter Brann tok avspark, drog seg forbi tre tippeligaspelarar og viste at dette var ingenting å vera redd for.

Respekten for motstandaren prega likevel heimelaget gjennom heile opningsomgangen. Var ein i tvil om ein skulle storma fram i rom eller halda att og trygga, vart siste alternativet valt. Dermed vart litt for mange ballar slått på løp som ikkje kom.

Brann viste med ein gong at dei var av ein heilt annan kvalitet enn det som vanlegvis gjestar Husnes Idrettspark, men dei tid-lege forsøka til Brann-spissane Sæternes og Winters vart rutinert stogga av forsvarskjempene Trond Inge Haugland og Ronny Hamre.

Nære, men ikkje nære nok

Offensivt måtte Trio i stor grad basera seg på at Johnny Furdal skulle stikka gjennom til Roger Røssland, som så skulle springa frå Kristian Ørn Sigurson. Røssland har garantert hatt meir takknemlege midtstopparar å bryna seg på. Sigurson parkerte den sterke og rappbeinte husnesingen i alt av løpsduellar.

Utover i førsteomgangen innsåg Triospelarane at det faktisk gjekk an å spela fotball mot me-ritterte gjester, først og fremst med Haugland og Furdal som strategane bak det som vart skapt. Etter 29 minutt fyrte Furdal laus frå 20 meter, men Torbjørnsen i Brannburet får hanskane på ballen. Returen kom Roger Røssland først på, utan at det gav Torbjørnsen meir trøbbel.

Så skjedde det som det ofte skjer mot tippeligalag, i det augneblikket ein gjev vekk litt for mykje rom, straffar dei deg. Solli akselererte forbi midtbanen til Trio, og før forsvaret rakk reagera hadde han rykka seg aleine med målvakt Inge Tungesvik. Den tidlegare landslagsspelaren gjorde ingen feil, og sendte Brann, for dagen i lyseblått, i leiinga. Furdal testa skotfoten på ny, og Torbjørnsen måtte i full strekk for å få klypene på ballen, før Brann skrudde opp tempoet att.

Å stogga ein Erik Husklepp i full galopp, er like lett som å stoppa røyk. Etter 37 minutt lukkast det omsider Gaute Skogtun å få lagt han i bakken, men diverre for Trio prikka Bengt Sæternes det påfølgande frisparket kontrollert i krysset til venstre for Tungesvik.

Ein dobbel Tungesvik

Andre omgang starta tamt. Sæternes brann ein sjanse frå godt hald før Tungesvik trødde til med ein dobbelredning for utklyppsbøkene. Ei strak Eirik Bakke-vrist frå 12 meter vart stoppa meisterleg, før Trond Fredrik Ludvigsen hamra til frå enno kortare hald – rett på keeper. Midtvegs i omgangen spela heimelaget seg flott til dagens største Trio-sjanse. Venstreback Jim Are Hansen løfta ned til Gaute Skogtun, som la ballen fint inn til Eirik Musland. Han kom aleine inn på bakarste stolpe, men avsluttinga gjekk over og til sides for mål.

Like etter fekk innbytar Johannes Hjelmeland ei lang tå på eit innlegg frå Musland, utan at han fekk nok tå på ballen til å styra den i mål. Så rakna det for heimelaget dei siste ti minutta. Både hovud og bein var naturleg nok slitne på slutten, og vegen heim til eige mål vart lang. Gjestene visste å utnytta gjestfridomen som Trio baud på, og i løpet av to minutt dobla Sæternes og Haugen leiinga. På overtid prikka Solli inn sin andre for dagen, og 5-0 vart sluttresultatet.

Imponerte Mons

– Jobbar dei like hardt som dette i kvar kamp, rykker Trio opp, var attesten frå Brann-trenar Mons Ivar Mjelde umiddelbart etter kampen.

Han såg sitt eige lag scora fem, men meinte laget kunne ha putta fleire.

– Me kan scora ti om me er skjerpa i avsluttingane. At Trio ikkje scorar handlar mest om dugleik, meinte Mjelde, som gav kreditt til heimelaget for motstanden dei ytte.

Ville hatt mål

– Det var trist å ikkje scora, men me vart kontra i senk den siste tida. Men dette var kjekt, og eg tykkjer gutane presterte godt. Etter ein fest som dette blir utfordringa å omstilla oss til oppgjeret mot Hovding på onsdag, sa trenar Agust Hauksson etter kampen.

– Veldig kjekt

Dei to spelarane med røynsle frå høgare divisjonar var dei som merka seg mest ut for heimelaget. Trond Inge Haugland hadde ro med ballen, tempo i beina og smartness i duellane, og var medverkande til at Brann sleit med å scora før dei siste ti minutta.

Johnny Furdal nytta midtbanen til utstillingsvindauga, og var på høgde med konkurrentane på midtbanen så lenge kreftene heldt.

– Dette var veldig kjekt. Det var mange som var gode i dag, og det var kjekt at me våga å spela ball. Det var ikkje avskrekkande nivå me møtte, så eg er nøgd med det me presterte i dag, sa Furdal etter 90 minutt med sliting på midtbanen.

At andre la merke til ballhandsaminga til Furdal, kunne ein mellom anna lesa i BT i går.

– For god for 3. divisjon, var attesten frå tomålsscorar Jan Gunnar Solli.

Det var òg andre som let seg imponera. I går la Nettavisen ut videosnutt med dribleria til Furdal under tittelen: «Her dribles tre Brann-spillere».

Ramma rundt kampen var fenomenal. Publikumstilstrøyminga såg ikkje ut til å enda, og sluttoppteljinga på 2810 be-talande tilskodarar viser at opningsrunden i cupen er ein fest for laga ute i distriktet. Brann baud opp til dans, og Trio visste å svinga seg. Publikum kom for å sjå lokale fotballheltar måla krefter med profilerte og profesjonelle spelarar som ein ser i tv-ruta veke etter veke. Og korkje Brann eller Trio svikta. Trass i at kjente spelarar som Martin Andresen, Petter Vaagan Moen og Tor-stein Helstad sat i Bergen og vansmekta, stilte Monsa-Mjelden med eit lag som hadde bite godt frå seg i Tippeligaen. Brann mønstra profilar som Sæternes, Winters, Bakke, Solli, Gashi, Hanstveit og ikkje minst, den beste forsvararen i norsk fotball, Sigursson. Det viser at Brann både tar Trio og cupen alvorleg. Og ikkje minst betyr det at Brann tar sin eigen posisjon som flaggskip for vestlandsfotballen alvorleg. Når 2810 betalande tilskodarar kan gå nøgde heim etter eit heime-tap, er det fordi Brann er Brann. Og sundag ettermiddag var Brann akkurat så gode som eit tippeligalag skal vera, men heller ikkje betre enn at Trio fekk bidra med sitt. Ser ein stort på det oppførte Brann seg akkurat slik gode gjester skal oppføra seg.

Trio -Brann 0-5 (0-2)

31. min. 0-1 Jan Gunnar Solli

38. min. 0-2 Bengt Sæternes

83. min. 0-3 Bengt Sæternes (str.)

84. min. 0-4 Helge Haugen

91. min. 0-5 Jan Gunnar Solli

Dommar: Chriss Bjorøy, Bjarg

Trio: (4-2-3-1):

Inge Tungesvik

Henrik Røssland

Ronny Hamre

Trond Inge Haugland

Jim Are Hansen

Rolf Vidar Hansen

(Christian Sundsteigen i 15 min.)

Gaute Skogtun

Eirik Musland

Johnny Furdal

Kåre Andre Fredlund (Erling Hansen i 30 min.)

Roger Røssland (Johs. Hjelmeland i 26 min. )

Brann: (4-4-2):

Johan Thorbjørnsen

Bjørn Dahl

Armann Björnsson

Kristjan Örn Sigurdsson

Erlend Hanstveit

Jan Gunnar Solli

Eirik Bakke

Ardian Gashi

(Helge Haugen i 26 min.)

Erik Huseklepp (Ramiro Corrales i 15 min.)

Bengt Sæternes

Robbie Winters

(Trond F. Ludvigsen i 45 min.)