Cirkus Agora byter frå Uskedalen til Husnes
Mot alle odds er Cirkus Agora på turné rundt i landet. Måndag og tysdag kjem dei til Kvinnherad. Men framsyninga blir ikkje på Børneset, som fyrst meldt.
Publisert
– Me er absolutt råka av krigen, seier eidaren Jan Ketil Smørdal på telefon frå Notodden.
Der hadde Cirkus Agora framsyningar onsdag og torsdag denne veka. På veg vestover stoppar dei i Gvarv, Åmot og Odda.
Annonse
Måndag og tysdag var opphavleg plan at det skulle bli sirkus på industriområdet på Børneset i Uskedalen. Men fredag føremiddag vart det bestemt å flytta til grusplassen utanfor Husnes Storsenter i staden.
– På Børneset er det ikkje flatt nok, det er for smalt og for mykje stein. Vi er veldig glade for at dette vart oppdaga i tide, og takka vera ein lokal entreprenør vert det i staden framsyning utanfor Husnes Storsenter. Også sentersjef Terje er veldig positiv. No kjem vi meir sentralt, og staden er betre på mange måtar, seier sirkussjef Jan Ketil Smørdal til Grenda.
Nede i to år
– Me har vore nedstengte i to år, som det meste anna. Tida har me brukt godt. Alt er nytt, for me har brukt pandemien til å pussa opp og oppgradera. Blant anna er teltet nytt, med plass til 650, seier Smørdal vidare.
Annonse
Han vedgår at det har sett ganske mørkt ut for sesongen berre for kort tid sidan. Den pågåande krigen i Ukraina har avskore han frå alle hans tekniske tilsette, som bur i Ukraina.
Til Kvinnherad kjem han med ein skreddarsydd framsyning, der han har med 35-40 i følgjet til sirkuset.
