Byter drivstoffleverandør og kjedenamn

I januar vart det kjent at bensinstasjonskjedene Best og YX ynska å slå seg saman. Det nye selskapet blir i hovudsak eigd av forhandlarane sjølve, men også Uno-X skal inn på eigarsida. Uno-X, som er kontrollert av Reitan-familien, er morselskapet til YX. I mars var det klart at Konkurransetilsynet godkjende fusjonen, og no den 15. august var alle formalitetar fullførte og det nye selskapet YX Norge AS registrert i Brønnøysund.

Som ein konsekvens av samanslåinga, skal Best-stasjonen i Dimmelsvik byta drivstoffleverandør, frå Circle K til YX. Opphaveleg vart det sagt at dette skulle skje allereie 26. august, men det er no utsett til 30. september. Årsaka har med pumpetekniske leveransar å gjera.

– Vi blir framleis ein sjølveigande stasjon, men kjem inn i ei mykje større kjede, seier dagleg leiar i Dimmelsvik Bil AS, Bernt Bjørsvik.

– Det blir den tredje største bensinstasjonskjeda i landet, med cirka 280 stasjonar, opplyser økonomiansvarleg Britt Torill Mathiesen.

Ny kasseløysing

For kundane blir det nokre praktiske endringar. Bedriftene skal over på Uno X-kort, medan privatkundane kan nytta enten YX- eller Coop-kort. Visuelle endringar blir det ikkje så mange av enn så lenge.

– Nei, ikkje førebels. Det er mykje som ikkje er landa enno, så det blir nok ein kombinasjon av YX og Best ei stund. Frå 30. september er det truleg berre pumpene som blir omprofilerte, seier Bjørsvik.

– Vi gler oss til litt oppfrisking av pumpene og andre ting, supplerer Mathiesen. Ho legg til at det også skal koma ny kasseløysing.

– Kva får endringa å seia for dåke som bedrift?

– Det blir ei større kjede som får eit breiare tilbod til kundane, i alle fall nasjonalt. Kundane skal få like gode eller betre vilkår. Ei sterkare kjede kan skaffa seg betre innkjøpsavtalar, slik at vi greier å halda tritt i framtida. Dei små kjedene har ikkje så mange kort på handa, men no kan vi greia å oppretthalda konkurransedyktige prisar, analyserer Bernt Bjørsvik.

Burgaren

Fusjonen påverkar ikkje berre salet av drivstoff, men også kioskdrifta.

– Vi har mykje dårlegare innkjøpsvilkår enn matvaregigantane. Vonleg får vi litt meir makt bak innkjøpa, sjølv om eg ikkje trur det vil slå veldig ut, vurderer Britt Torill Mathiesen.

Bensinstasjonen i Dimmelsvik har vore med i Best i 11 år. Tidlegare stod det Statoil på skilta. Kva som vert nytt logonamn er ikkje bestemt enno.

– Det blir vel ein dialog om dette framover. Men YX er nok eit meir innarbeidd namn enn Best, så det er vel stor sannsynlegheit for at blir namnet, kommenterer Bjørsvik.

Til slutt; det viktigaste spørsmålet av alle: Kva skjer med Best-burgaren?

– Den skal vi fortsetja med, smiler Britt Torill Mathiesen.