Byr på dansefest for pensjonistane
I samband med den internasjonale eldredagen til FN vil pensjonistforbundet HVØ stella til fest med gladdans for alle som er 60+ på Hatlestrand, Varaldsøy, Ølve og omland.
Publisert
Sist oppdatert
– Me vil understreka at denne festen er for alle pensjonistar i bygdene, uansett om du er medlem eller ikkje i Pensjonistforbundet HVØ, og prisen er eins for alle, så kom og få deg ein svingom! skriv styret i ei pressemelding.
I fjor var festen på Hatlestrand, men denne gongen ynskjer dei velkomne til ungdomshuset i Ølve, i slutten av november.
Annonse
– Før maten vil Jon Kjerland kåsera over eit sjølvvald, interessant og morosamt emne. Kvam Trekkspelklubb vil underhalda før maten, og spela til allsong og både gamaldans og gladdans etterpå. Me kan lova at dansefoten ikkje vil halda seg i ro når Kvam trekkspelklubb drar trekkspelet og toradaren i gang, melder Pensjonistforbundet HVØ.
Dei vil også by på snittar, kaffi og heimebakte kaker, og oppmodar publikum om å ta med godt humør og gode dansesko og bli med på fest den 27. oktober.
– De er alle hjarteleg velkomne! sluttar styret i Pensjonistforbundet HVØ.
