Byggservice AS har vunne anbodskonkurransen om Børnes tømmerkai

Det var to verksemder som kom med tilbod til kommunen på å utføra arbeidet med å oppgradera, forsterka og utdjupa kaien, Byggservice vann konkurransen mot Brødrene Musland maskin AS.

– Det er veldig kjekt å vinna lokale oppdrag. Kai har vi god erfaring med, så det er eitt av våre fagfelt. Dersom vi får kontrakten blir det oppstart så snart som råd er. Vi har planlagt bemanning og alt er klart, seier Eli Eiane Klyve, dagleg leiar i Byggservice AS.

I 2020 vart planane for oppgraderinga av kaien kjend. Kaien, som blir eigd og drifta av Søre Kvinnherad Skogeirarlag i lag med kommunen, stod ferdig i 1991. Sidan den gong har den blitt mykje nytta, og det er dessutan venta mykje lokal hogst i åra som kjem.

Som Grenda tidlegare har skrive er den kommunale delen er i dårleg stand, og ei nabbe mot aust gjer at ein ikkje kan ferdiglasta dei største skipa. Kostnaden med oppgraderinga vart i 2020 vurdert til nær 10 millionar kroner.

Auka med 4 millionar

Pris og kostnad med arbeidet vart vekta som 70% i vurderinga, medan kvalitet stod for dei resterande 30% av vurderingsgrunnlaget. Byggservice sitt kostnadsoverslag kjem på 13.952.446 kroner utan moms, noko som tilseier rundt 4 millionar meir enn prisantydinga frå 2020.

– Situasjonen i verda gjer at alle prisar har stige, slår Eiane Klyve fast.

Dette gjer også at kommunen i tildelingsbrevet understrekar at endeleg finansiering må bli godkjent av kommunestyret for at kontrakten skal bli tildelt Byggservice.

«Det tas uttrykkeleg atterhald om at inngåing av kontrakt berre vil skje etter endeleg finansiering er på plass og finansieringspolitisk godkjenning og vedtak om realisering. Oppnår me ikkje slik godkjenning vil det ikkje bli tildelt kontrakt», skriv dei i brevet som ligg på postlista.