Byggjestart i mars

– Dette blir eit mykje større løft enn mange har sett for seg, seier Peder Sjo Slettebø om opprustinga av Opsangervegen. Han vonar arbeidet kan starta opp i løpet av neste månad.

Før formannskapsmøtet på torsdag møtte ordførar Peder Sjo Slettebø og varaordførar Hans Inge Myrvold pressa for å fortelja siste nytt om Opsangervegen.

– Det er ei stor investering, men takka vera at prisane i bransjen er låge, så får vi mykje for pengane, innleia Slettebø. Prosjektet er kostnadsrekna til 80 millionar kroner eks. moms, inkludert veg, vatn og avløp.

Ordføraren meiner den mest iaugefallande biten vert den såkalla Fonteneplassen. Rett over vegen ved Europris skal det i følgje planane koma ei hoppande fontene, blømande staudar, amfi, bryggje kledd i skifer og badeplass.

– Vi jobbar også for å få til ei utsmykking i rundkøyringa ved bensinstasjonen. Og så vert det eit kjempeløft langs vatnet, med mur eit stykke bortover. Heile strandpromenaden blir vesentleg finare. Sentrum kjem til å ta seg heilt annleis ut når dette er ferdig, lova Slettebø.

 

140 millionar

Han vedgår at kommunen ikkje er komen til semje med alle grunneigarane langs traseen enno, men hevdar alt likevel ligg til rette for snarleg oppstart.

– Arbeidet vil starta ved rundkøyringa ved bensinstasjonen så snart som mogleg, i alle fall i løpet av mars. Men i framtida trur eg vi må starta grunnforhandlingane mykje tidlegare, det er noko må vi ta lærdom av etter denne prosessen, sa Slettebø, som opplyste at heller ikkje alle grunnspørsmåla i Lundsneset er avklara enno.

Ordføraren gav tre hovudårsaker til at ein vel å rusta opp den kommunale Opsangervegen no.

– Vi må gjera noko med vatn og avløp, det trengs. For det andre så er ikkje vegen trygg nok, spesielt ikkje ved skulane. Og når vi har eit sentrum, så er det rett å gjera det så fint som mogleg, kommenterte han. Han la samstundes til at kommunen totalt kjem til å investera for 140 millionar kroner i Husnes sentrum i år.

 

Les mykje meir om Opsangervegen i Grenda på tysdag.