Byggjer nye Fjelberg ferjekai

– Det byrjar å likna på ein kai der ute no. Om ein er der ute og ser får ein eit godt inntrykk av korleis det kjem til å sjå ut, fortel byggeleiar i Vestland Fylkeskommune Cecilie Mathisen.

Opphavleg skulle arbeidet vere ferdig i løpet av februar, men vert litt forseinka. Mathisen fortel at dei prøvar å bli ferdige i løpet av mars.

– Målet er å vera ferdige før påsken og pinsa. Vi får ein fase no neste veke der sjølve kaia er nokolunde ferdig, til dømes kjem den nye brua på plass, fortel ho, og legg til;

– Det blir nok råd å føra trafikk over nye ferjekaia før heile prosjektet blir offisielt ferdig.

Det er mykje som skal på plass når ein byggar ny ferjekai. Ikkje berre sjølve kaia, men også landareal rundt skal på plass.

– Det er ein del ting som renovasjon og andre omkringliggjande ting som kjem til å ta litt tid. Men som sagt kan ein bruka sjølve kaia før dette er ferdig, fortel Mathisen.

Ho fortel vidare at arbeidet så langt har gått veldig greitt føre seg, og ho har ikkje høyrd nokre anna frå arbeidarane eller ferjemannskapet.