Byggjer grønt reiarlag frå kaikanten i Rosendal

Etter fem år med utvikling tar Magnar Hellesøy store planar med seg tilbake til røtene. Det einaste som står mellom han og realisering er eit par hundre millionar kroner.

– Eg plar seia at eg trur på han som gjekk på vatnet, men viss eg skal gå på vatnet må eg ha båt, seier Hellesøy.

Og båtar har han store planar om å laga. No jobbar han med å skaffa 300 millionar kroner for å få bygd to 90 meter lange katamaranar som skal frakta laks mellom Vestlandet og Rotterdam.

Grøn løysing

Sjølv om han er utdanna og har jobba som prest, byrja han i 2014 å jobba med korleis han kunne få fram ein shippingidé.

– Det eg til slutt forstod var lurt å gjera, var å byggja ein fraktebåt som kunne frakta ting raskt og enkelt, billegare, betre for miljøet, med eit stabilt skrog som kunne gå i grov sjø, fortel han.

No er han komen så langt at han opnar kontor i Rosendal neste tysdag, saman med eit knippe tilsette i lokala der Gullsmed Eide helt til.

– Eg vil halda tett fram til opninga kven som blir med på laget, smiler han løyndomsfullt.

– Eg vil uansett kunna jobba herifrå lokalt, og her er hovudkontoret, så får me sjå kor storkapitalen kjem i frå. Eg har ambisjonar om å veksa frå kaikanten i Rosendal, seier Hellesøy.

Ideen brukte han eit år på å finjustera.

– Eg brukte så eit år på å leita etter båtar som passa, men fann det ikkje. Så eg såg at eg måtte til å teikna båten. Eg oppdagar då eg hadde teikna båten, at dette er eit heilt nytt design, og difor starta eg i november 2018 Green Ship Design, forklarer han.

Til Rosendal kjem han med fire selskap som skal jobba saman mot same målet

Hellesøy Shipping Holding, som blir reiarlaget.

Green Ship Design, som teiknar båten.

Green Ship technology, som skal byggja båten.

Green Ship Trading, importselskap.

18 timar til Rotterdam

– Skal me få dette til, så må aktørane signera på at dei vil bruka vår båt. Då hentar me 50 hengjarar med laks der det passar, stoppar kanskje éin til to plasser på veg sørover. Bergen – Rotterdam på 18 timar går fint, seier ein overtydd Hellesøy.

Båten kan gå med ein marsjfart på 22 knop, men kan også gå heilt fint i 32 knop.

– Det kostar sjølvsagt litt meir, så det er eit spørsmål om kva kundane ynskjer. Viss det gjer laksemarknaden i Europa tilgjengeleg i eit par dagar ekstra, så er det kanskje verd å gå raskare, meiner 43-åringen.

Det går 300 trailerar med norsk laks over Svinesund kvar dag. Såleis er det absolutt ein marknad for å transportera fersk laks ned til kontinentet.

– Trekkvogner står klare i Rotterdam til å køyra hengjarane ut. Det sparer køyre- og kviletid på sjåførane. Me legg til rette for å ta eksporten av norsk laks raskare, rimelegare og grønare enn om ein køyrer bil, seier han med seljarstemma på.

Mellom det dei har rekna på, er bølgehøgder, og konklusjonen er at dei skal klara 95 prosent regularitet på transport over Nordsjøen. To intensjonsavtalar med lakseeksportørar er på plass, og dei er etter sigande ivrige etter å sjå denne båten på sjøen fort.

Treng 300 millionar

Båten det er snakk om, er ein 90 meter lang og 32,5 meter brei katamaran, med stort overbygd dekk med plass til 50-55 semihengjarar. Sjølv meiner han at han har lagt seg for hogg når han har eksponert seg i Finansavisen og iLaks den siste veka. Presentasjonar der ser han på som eit stempel for kor langt prosjektet er kome til no.

Samtidig går han no inn in ein kapitalkrevjande fase.

– Det er ein emisjon på gang for å få 5 til 8,5 millionar dollar inn i Green Ship Design. Det er tidskrevjande å få til. Me treng også 30 millionar dollar til å byggja båtane, altså rundt 150 millionar kroner sjølve pr. båt for å få bygd dei, pluss lån. Dette har ein krefter ute til å jobba med. Me har store aktørar med oss som seier at dette prosjektet må fly, seier Hellesøy.

Han trudde ikkje at ha skulle jobba med skipsbygging, og utdanna seg til noko heilt anna. 27. januar 2007 vart han høgtidleg ordinært til prest i Kvinnherad kyrkje av biskopen i Bjørgvin.

– Eg er komen heim etter 28 år, seier Magnar Hellesøy.

15 år og ni månader gamal flytta han til Voss. No i 44-årsalderen har han flytta inn i heimehuset på Løfallstrand.

– Godt å landa litt, seier han om flyttinga.

– Eg er ikkje av dei største laksane i sjøen, men eg er ein glad laks, og har lyst å få dette til.

Tar reiarlaget 2-3 % av marknaden på transport, så er me fort over ti båtar. Men det er mykje som skal klaffa på vegen dit. Den største utfordringa er å få inn dei store investeringane raskt, sluttar Hellesøy.