Byggjer dagsturhytta seinhaustes

Kvinnherad kommune har bedt om utsett levering av dagsturhytta.

Kommunen har fått løyve til å fyka helikopter til Nautavatnet. Føremålet er å fundamentera, transportera opp og montera den etterlengta dagsturhytta. Løyvet er gitt for tidsrommet 3. mai 2021 til 1. juni 2022.

Men sjølve bygginga vil ikkje skje før til hausten.

– Vi har bedt om utsett levering av hytta. Dette for at vi skal vera sikre på at alt er klart når hytta kjem, seier folkehelsekoordinator Kristian Helgesen.

Det er spesielt to tilhøve han tenkjer på. For det fyrste så ligg Nautavatnet nesten 700 meter over havet, og vinteren har vore kaldt. For det andre at byggjesaka må vera ferdig handsama og godkjent.

– Vi tek ikkje sjansen på at byggjesaka ikkje skal vera ferdig når hytta kjem, forklarar Helgesen.

 

Rask bygging

Stad Kystbygg AS, som produserer hyttene, har teke omsyn til ynsket frå Kvinnherad, og flytta hytta ved Nautavatnet lengre bak i køen.

– Vi har nok ikkje hytta på plass før i oktober-november. Fundamenteringa vil truleg skje om lag éin månad tidlegare. Hytta kjem som ferdige modular, og vert bygd på eit par dagar, opplyser Kristian Helgesen.