Bygdekvinnelaget om kulturprisen: – Heilt overveldande

Den travle dama er mellom brukarar i heimetenesta, og har dermed avgrensa tid til pressa. Vi får likevel tid til ein kort prat før ho blir nøydd til ringa opp igjen etter at arbeidsdagen hennar er slutt.

Omvikdalen Bygdekvinnelag får kulturprisen

– Men eg må snart springa og henta barnebarna på skulen, ler ho idet ho slår på tråden igjen.

Bladfyken får likevel tid til å stilla nokre klassiske spørsmål.

– Kva følar du no?

– Vi har fått så mange flotte gratulasjonar og fine ord at eg veit nesten ikkje kva eg skal seia. Det er kjekt at arbeidet som har blitt gjort, ikkje berre no, men opp gjennom tida, viser igjen, seier Ester.

Ho dreg spesielt fram arbeidet dei har hatt med den populære bunadsboka «Kvinnheradsbunaden», som kom ut i 2019. Sjølv blei ho med i bygdekvinnelaget i 2015.

Laget sin trufaste innsats for å halda i hevd lokal kultur knytt til mat, bunad, tradisjonshandverk, bygdetradisjonar samt eit stort inkluderingsarbeid for nytilflytta kvinner, er noko av det levekårsutvalet trekte fram i grunngjevinga si for kvifor kulturprisen i år skulle gå til Omvikdalen bygdekvinnelag.

Medlemsvekst

Levekårsutvalet meinte òg at laget hadde fornya seg ved å ha fokus på mellom anna gjenbruk og berekraft, og vidare at arbeidet deira har hausta nasjonal merksemd og påskjøning. Esther fortel at Omvikdalen bygdekvinnelag er heilt i toppen på landsbasis når det kjem til medlemstal, og at interessa for laget har vakse også hos dei unge.

– Vi har fått med oss fleire yngre medlemmar, som for eksempel Karoline Helleland Sahr, som er skrivar og utruleg dyktig på det digitale. Etter at ho delte gladnyheita på Facebook eksploderte det med gratulasjonar, fortel ho, og legg til;

– I tillegg har vi også fått nye tilskot frå Sunde, Husnes, Åkra og Mauranger for å nemna nokre - her er mange bygder representerte, ikkje berre frå Omvikdalen. Hos oss er alle velkomne.

Driftige damer

Nøyaktig kva som er årsaka til at laget har fått ny popularitet den siste tida, er ikkje Esther heilt sikker på, men ho har nokre tankar.

– Eg trur jo at alt det vi held på med, alt frå bruktmarknad til bunadskafé, er noko som høyrest kjekt ut for folk. Dessutan har vi mange driftige damer, og som leiar er det veldig kjekt når medlemmer tek initiativ til å dra i gang kjekke tiltak. Vi hadde ikkje vore der vi er i dag hadde det ikkje vore for denne handlekrafta, rosar Esther, som legg til at kulturprisen gir stor motivasjon til å halda fram med det gode arbeidet i framtida også.

Korleis prisen skal feirast har leiaren enno ikkje fått drøfta med resten av styret, men ho lovar at det vil bli ei markering.