Bustadpakken hamnar i retten

Ein av tilbydarane som ikkje nådde fram i anbodet om bustadpakken har klaga kommunen inn for tingretten. At det er usemje om saka kom også svært tydleg fram i formannskapet.

Borvika AS vart vraka i anbodet om bustader på Husnes, fyrst og fremst grunna avstanden til sentrum. Dei klaga saka inn for Sunnhordland tingrett, og fekk aksept for at det er tilstrekkeleg sannsynleggjort at kommunen braut regelverket ved å utelukka selskapet frå dei siste forhandlingane. Tingretten gav ei «midlertidig forføyning» mot kommunen, noko som gjer at bindande kontraktar ikkje kan inngåast før saka er avgjort. Partane møtest til rettsforhandlingar den 10. mars.

Kommunen sin advokat Åshild Fløisand hevdar forføyninga er basert på feilopplysningar som vart oppgitt i klagen frå Borvika AS. Ho er difor ikkje bekymra for utfallet.

– Vi skal få dette omgjort etter at dei har høyrt vår side av saka, skriv ho i ein e-post til kommunen.

 

Håplaust

Men i formannskapet fekk Borvika AS full støtte hjå Ap.

– At Borvika får så lågt som 4 poeng for lokaliseringa, medan dei andre hamnar på 10 er merkeleg. Det er håplaust at det skal vektast så ulikt når alle tilboda ligg på Husnes. Viss ikkje Borvika også skal ha 10 poeng, så forstår eg ingenting, sa Hilde Enstad.

Ho stussa også over storleiken på dei leilegheitene som vann anbodet (ved hotellet og Posten).

– Kvifor vel ein leilegheiter på 55 kvm når det finst tilbod om andre på 79 kvm? Dette er dei minste leilegheitene eg har sett som er blitt tilbydd fyrstegangsetablerarar. Er det einslege vi tenkjer på? Eg trudde det var barnefamiliar vi skulle hjelpa, kommenterte Enstad.

Ordførar Peder Sjo Slettebø (H) sa seg svært overgidd over kritikken.

– Det var eit samrøystes formannskap som ynskte leilegheiter i Husnes sentrum. Mitt inntrykk er at Ap ikkje er nøgd med den løysinga som er valt, og difor leitar etter formelle feil. Eg tykkjer det er sørgjeleg at Ap ikkje kan gle seg over at det endeleg skjer noko med hotellet og i Husnes sentrum, meinte han.

– Vi er ikkje imot bustader i Husnes sentrum, det er vi sjølvsagt veldig for, passa Gretha Rød (Ap) på å understreka.

Rådmann Odd Ivar Øvregård hevda han hadde lytta til fagfolk når det gjeld eigna storleik på husværa.