Buss og ferje kan bli hardt råka av streik
Det kan bli storstreik frå søndag morgon, om ikkje LO og NHO blir einige i tariffoppgjeret før kalenderen viser søndag 11. april.
Publisert
Sist oppdatert
Meklingsfristen i tariffoppgjeret mellom LO og NHO går ut laurdag 10. april klokka 24.00. Skulle ikkje partane koma til einigheit før det, vil 23.548 arbeidstakarar i NHO-bedrifter gå ut i streik.
– Vi har alltid som mål å bli einige, men er også førebudde på streik, om det blir nødvendig. Eg konstaterer at det ikkje har vore mogleg å bli einig med NHO så langt, seier LO-leiar Peggy Hessen Følsvik i ei pressemelding.
Annonse
Ferjesamband
I pressemeldinga ligg det ved ein oversikt over dei bedriftene i landet som inngår i streikevarselet. Her kjem det fram at kollektivtrafikken vert hardt råka dersom det vert streik i privat sektor.
LO har nemleg teke ut ei rekkje kollektivtilbod i fleire av landets fylker, også i Kvinnherad.
– Med dette streikevarselet viser vi styrken og solidariteten i frontfagmodellen. Vi tar kampen for heile arbeidslivet mot NHO sitt provoserande krav om reallønsnedgang, og stiller oss solidarisk bak kravet om eit ekstra lønsløft for dei lågast lønna, seier LO-leiaren.
Annonse
Ved ein eventuell streik vil 5.500 bussjåførarar over heile landet bli tatt ut i streik. I tillegg er Fjord1 og Norled å sjå blant transportbedriftene som vert teken ut.
På lista over dei råka sambanda finn vi rute B på sambandet Skjersholmane – Ranavik og Rute 1 på sambandet Årsnes – Gjermundshamn.
