Budsjettet: – Kan ikkje kutta utan at det får konsekvensar

Den eine etter den andre i koalisjonen gjekk på talarstolen i Kommunestyret og sa kor stolte dei er over budsjettet. Også Bjørn Olav Tveit var tilfreds.

– Når vi ser rundt oss både i Vestland og resten av landet på kommunar som strevar med økonomien, så må dei gjera drastiske og hastige grep for å få endane til å møtast. Eg er glad for at eg er ein del av Kommunestyret i Kvinnherad som driv ei ansvarleg forvaltning av våre økonomiske ressursar. Det er ikkje berre ekstrainntektene som gjer at vi er gode, det er òg dyktigheit, sa han.

Tveit tykkjer ein i budsjettet skjøttar balansen mellom trygg økonomisk styring og investeringar som vil utvikla lokalsamfunnet vårt vidare. Men han påpeika at det også finst negative sider ved budsjettet.

– Vi skal ikkje underslå at dette budsjettet òg medfører ein reduksjon i tenestenivået på fleire område. Ein kan ikkje kutta utan at det får konsekvensar, og det skal vi ikkje lata som heller. Dette kan slå ut både ved at innbyggjarane vil oppleva redusert kvalitet og omfang, eller det kan slå ut i at dei tilsette må springa litt fortare, sa Tveit.

Ostehøvel

Han viste til at ein i kommunedirektøren sitt forslag kan lesa grundig om desse konsekvensane i fleire av sektorane.

– Det er ikkje berre behageleg lesnad. Vi kan lesa om stram bemanning og vakante stillingar, redusert vedlikehald og redusert vask, blant anna. Dette er nødvendig informasjon for oss å få, slik at vi som kommunestyre og innbyggjarane kan vita korleis nivået på drifta er, sa Tveit. Spesielt trekte han fram oppvekstsektoren. Der skal kommunen redusera årsverk tilsvarande 1,7 millionar kroner. Det er også andre kutt, som ifølgje Tveit vil vera tilnærma «ostehøvelnedskjeringar i form av reduserte rammetimetal».