Bruker ledig tid til brubygging i Fjellhaugen

Eldsjelene i Fjellhaugen Skisenter bruker den tida dei normalt hadde brukt på å preparera alpinbakken til å byggja bru over elva til Nautavatnet.

– Det gjer vi. No har vi ikkje nokon bakkar som det er vits å bruka ressursar på, for vi har ikkje anledning til å halda ope. Då fann vi heller ut at vi kunne gjera noko som har vore eit ynske, både frå oss og skigåarane. Nemleg å byggja ei permanent bru over elva frå Nautavatnet, seier dagleg leiar Øystein Svendsen i Fjellhaugen Skisenter.

 

Ledige ressursar

For deira del vil ei slik bru letta på arbeidet når dei preparerer fjelløypa. Medan det for skigåarane i område vil vera lettare å ferdast over elva både på sommar- og vintersdagar.

Dugnadsgjengen slepte opp pålane som skal vera den berande konstruksjonen på brua i helga, og fekk opp materialet til toppdekket tysdag. Men Svendsen trur ikkje at brua kan takast i bruk denne sesongen.

– Vi må venta til snøen smeltar litt ned for å få landfeste til konstruksjonen, så ho blir nok ikkje klar i år. Men vi fann ut at vi ikkje veit kor lenge desse koronatidene varer, og at vi då kunne bruka dei frigjorte ressursane til noko nyttig. Så difor sette vi i gong, seier Øystein.

 

Godt besøk

Sjølv om trekket er stengt, jobbar dugnadsgjengen i Fjellhaugen om dagen på for å leggja til rette for så gode turforhold som mogleg for skigåarane. Og skigåarar er det mange av.

– I helga var det fullt på parkeringsplassen med folk som nytta seg av moglegheita til å koma seg ut og lufta hovudet i finvêret. Så er det svært gledeleg å sjå at folk har fått augne opp for at det å betala avgift for parkering og bruk av løypene er ein liten sum å stå i for å kunna nytta seg av anlegget, seier han.

Dei fekk inn 4000 kroner i parkeringsavgift via Vipps i helga som var. Pengar som vidare blir brukt til å gjera anlegget så bra som mogleg for publikum.