Brukar ferien på å eksperimentera
Denne veka har det florert av ulike spanande tilbod for born og unge som dei kan vera med på i ferien, éit av dei er Forskarfabrikken sin sommarskule.
På Undarheim skule har to leiarar og femten deltakarar brukt dagane på å gjennomføra ulike eksperiment og prosjekt. Knapt halvvegs ut i veka har dei allereie laga alt i frå slim til å testa bleier og laga briller ein kan sjå på sola med. Akkurat denne dagen var dei i gong med å dyrka bakteriar.
Skitne telefonar
Annonse
– No skal me testa ulike overflater for å sjå kva som har flest bakteriar. Me skal sjekka om det er telefonen eller kroppen som har flest bakteriar på seg, fortel tre av deltakarane Victoria, Leonora og Elena.
Nokre andre deltakarar vel også å testa telefonen, men dei vel heller å testa den teknologiske duppeditten opp mot toalettet for å sjekka kor mange bakteriar det finst både i vaksen og på do. Den førebelse hypotessen deira er urovekkjande å tenkja på dersom den syner seg å vera sann.
– Me trur at telefonen er meir skitten enn doen, fordi doen blir oftare vaska, forklarer kvartetten Ayra, Emily, Mathea og Heili.
Ved roret for å losa den nyfikne og engasjerte gjengen gjennom den innhaldsrike veka står Iris Matre og Erling Steinsland. Fyrstnemnde er lokal kvinnhering og sistnemnde har teke turen frå Stavanger for å vera lærar for dei unge forskarane denne veka, men påpeikar at han har både familie og hytte i kommunen.
Annonse
– Eg kjente til Forskarfabrikken frå før, og då dei lyste ut ei stilling så såg det veldig gøy ut, seier Matre.
Steinsland seier seg einig. Til vanleg jobbar siddisen også innan realfag og er klar på at det er viktig å motivera og skapa interesse for realfaga blant born og unge.
– Det er veldig gøy, i tillegg er det veldig kjekt å få lært vekk og vist fram det ein kan, konkluderer Steinsland.
Ti av ti
Det etterlet ingen tvil om at dei unge deltakarane let seg inspirera og riva med når dei ivrig fortel om alle eksperimenta dei har gjort så langt.
– I går laga me nudlar av slim, og i dag har me laga slike briller som ein kan sjå på sola med. Me har også testa kor mykje væske ei bleie kan halde på. Bleia me testa klarte å suga til seg 1430 ml, fortel ein av deltakarane.
Annonse
– Og i morgon skal me laga UV-armband. Dei kan lyse i sola, legg ein annan til.
På spørsmål om kva dei tykkjer om veka så langt svarar fleire smilande i kor:
– Gøy! Ti av ti!
– Viss eg ikkje hadde blitt med på dette så hadde eg nok berre sete heima, understrekar éi.
Og kva det kjekkaste har vore av det dei har gjort, er dei heller ikkje i tvil om.
– Slimnudlane! konkluderer dei til slutt.
